(හසිත රංග ගුණතිලක)

තරුණයන්ට දේශපාලනය කිරීමට අවස්ථාව දිය යුතු නම් සුසිල් ප්‍රේමජයන්ත වැනි වයස්ගත මන්ත්‍රීවරු දේශපාලනයෙන් සමුගත යුතු බව වාරිමාර්ග ජල සම්පත් හා ආපදා කළමනාකරණ අමාත්‍ය දුමින්ද දිසානායක මහතා අද (19) කොළඹදී පැවැසීය.

පක්ෂ මහලේකම් ධූරයේ තමා සිටි කාලය තුළ ශ්‍රීලංකා නිදහස් පක්ෂය දරුණු ලෙස පරාජයට පත්වීම කණගාටුදායක තත්ත්වයක් බව සුසිල් ප්‍රේමජයන්ත මහතා පසුගියදා කළ ප්‍රකාශයට පිළිතුරු ලබා දෙමින් දිසානායක මහතා මේ බව පැවැසීය.

එහිදී අමාත්‍යවරයා මෙසේද කීය.

     ‘‘සුසිල් ප්‍රේමජයන්ත මන්ත්‍රීතුමයි මායි 2000 වර්ෂයේදී එකට පාර්ලිමේන්තුවට පිවිසුනා. දෙදෙනාගේම පාර්ලිමේන්තු දිවියට වසර 18යි.හැබැයි එතුමා මට වඩා වයසින් වැඩියි.

අපේ තාත්තටත් වඩා ප්‍රේමජයන්ත මන්ත්‍රීතුමා වයස වැඩියි.සංධානයේ මහ ලේකම් ධූරය නැති වීමත් සමඟ එතුමා ගොඩක් දුක්වුණා.ශ්‍රීලංකා නිදහස් පක්ෂය මැතිවරණ 2ක් 3ක් පරදිනකොට පක්ෂයේ ජාතික සංවිධායක ධූරය එතුමා හෙබවුවා.ඒ කියන්නේ පක්ෂයේ පරාජයට එතුමා වගකිව යුතුයි.

ජාතික ආණ්ඩුව තුළ ඇමැති ධූර දරමින් සියලු වරප්‍රසාද බුක්ති විදපු ප්‍රේමජයන්ත මහතා ආණ්ඩුවෙන් පිටතට ඇවිල්ලා ඉතාම පහත් ලෙස ආණ්ඩුව විවේචනය කරනවා.

එතුමා කරන සියලු ප්‍රකාශ වෛරයෙන් කරන ප්‍රකාශ.රටේ සියලු ජනතාව දන්නවා එතුමගේ ප්‍රකාශ වල ගතයුතු හරය.එතුමාගේ ක්‍රෝධය අවසන් වනතුරු අපි බලන් ඉන්නවා.මගේ තාත්තටත් වඩා ප්‍රේමජයන්ත මන්ත්‍රීතුමා වයසින් වැඩි නිසා පක්ෂයේ දෙවැනි පරම්පරාව ශක්තිමත් කරන්න කියලා ඉල්ලීමක් කරනවා.‘‘