(ඩයනා උදයංගනී)

ශ්‍රී ලංකාවෙන් 1985 වසරේදී පකිස්තාන රජයට ලබාදී ඉස්ලාමාබාද් අගනුවර පිහිටි සත්ව උද්‍යානයේ තනිව හා පීඩාකාරී අයුරින් කල් ගෙවන ”කාවන්” නම් හස්තියා ඉන් නිදහස් කරන ලෙස එරට මහාධිකරණය පසුගියදා නියෝග කර ඇතැයි වාර්තා වේ.

මෙම හස්තියා ශ්‍රී ලංකාව විසින් පාකිස්තානයට ලබාදෙන විට වයස අවුරුද්දක් පමණ වී ඇති අතර කාවන් මේ වන විට 35 හැවිරිදි වියෙහි පසුවන අතර එම හස්තියා 2012 වසරේ සිට එම සත්වෝද්‍යානයේ ඉතා පීඩාකාරී අන්දමින් තනිව ජීවත්වන බව එරට මාධ්‍ය වාර්තා සඳහන් කරයි.

කාවන්ගේ, සහාකාරිය ලෙස 1990 වර්ෂයේදී ශ්‍රී ලංකාවේ සිට පාකිස්තානයට යැවූ ”සහේලි” නම් ඇතින්න 2012 දී මියයාමෙන් පසු කාවන් හස්තියා මෙසේ 08 වසරක් පුරා තනිවම ඉස්ලාමාබාද් සත්ව උද්‍යානය තුල ජීවත්ව තිබෙන්නේ නිසි පහසුකම් හෝ නොමැතිව බව වාර්තා වේ.

මෙම හස්තියාගේ නිදහස හා ඔහුට යහපත් ස්ථානයක් ලබා දීමේ අරමුණින් සුප්‍රකට ඇමෙරිකානු ගායන ශිල්පිනියක් වන චේර් (ක්‍යැර) ඇතුළු ස්වේච්ජා සංවිධාන එකමුතුවක් දැවැන්ත විරෝධාතාවයක් ආරම්භ කර තිබූ අතර මෙම හස්තියා නිදහස් කරන්නැයි පාකිස්තාන් අධිකරණයට පෙත්සමක් ගොනුකරමින් ඉල්ලීමක් ද කර ඇත.

මෙම හස්තියාට නිදහස ලබා දෙන ලෙස එරට බලධාරීන්ට බලකරමින් ලක්ෂ 02 ක පිරිසක ගෙන් යුත් අන්තර්ජාල පෙත්සමක් ද අත්සන් කර ඇත.

මීට අමතරව මෙම හස්තියා පාදවල විලංගු යොදා දම් වැල් යොදා ගැට ගසා තිබෙන අයුරු ජාත්‍යන්තර මාධ්‍ය පවා වාර්තා කර ඇති අතර ටකරං මඩුවක සිටි මෙම හස්තියා ඇතැම් අවස්ථාවල සෙල්සියස් අංශක 40 ට අධික උෂ්ණත්වයෙන් ඔහු දැඩි ලෙස පිඩා විදින බවටද වාර්තා කර තිබිණි.

මෙම සියලු කරුණු සැලකිල්ලට ගනිමින් පාකිස්තාන මහාධිකරණය කාවන් නම් මෙම හස්තියා යොමු කළ හැකි සුදුසු සත්ව උද්‍යානයක් සම්බන්ධයෙන් ශ්‍රී ලාංකික බලධාරින් සමග සාකච්ජා කොට දින 30 ක් ඇතුලත අධිකරණයට දැනුම් දෙන ලෙස ද එරට වනජීවී නිලධාරීන්ට නියෝග කර තිබේ.

මහාධිකරණ තීන්දුව ප්‍රකාශයට පත්කරමින් අගවිනිසුරු අකාර් මිනල්ලා පවසා ඇත්තේ මෙම හස්තියාට පහසුකම් සැපයීමට සහ ජීවත්වීමට සුදුසු පරිසරයක් ලබාදීමට බලධාරීන් ක්‍රියාකර නැති බවයි.

ඉස්ලාමාබාද් මහාධිකරණය නියෝග කර ඇත්තේ  කාවන් අලි ඇතුන් සිටින සංකීර්ණයකට හෝ රටින් පිටත ස්ථානයකට යැවිය යුතු බව ද ඔහු ප්‍රකාශ කර ඇත.

අධිකරණය විසින් ලබාදුන් එම නියෝගය ලබාදීමත් සමග අමෙරිකානු ගායිකාව වන චේර් සිය ට්විටර් ගිණුමේ සටහනක් තබමින් ප්‍රකාශ කර ඇත්තේ ”එදින ඇයගේ ජිවිතයේ වටිනාම දිනය” යනුවෙනි.

මෙම තීන්දුව ප්‍රකාශ කිරීමෙන් පසු කාවන් යළි මෙරටට ගෙන්වා ගැනීමට ක්‍රියා කරන්නැයි මෙරට සත්ව හිමිකම් සංවිධාන සමාජ මාධ්‍ය ඔස්සේ රජයෙන් ඉල්ලීම් ද කරමින් සිටී.