(දියතලාව - ඩී.කේ.රත්න)

බණ්ඩාරවෙල නගරයේ කොමර්ෂල් වෙළඳ සංකීර්ණයේ පවත්වා ගෙන ගිය ව්‍යාජ කච්චේරියක් වැටලූ බණ්ඩාරවෙල පොලිසිය එහී  තිබී ව්‍යාජ ලෙස සකස් කරන ලද උප්පැන්න සහතික, හැඳුනුම්පත්, හොර සහතික, විවිධ රබර් මුද්‍රා ඇතුලු එම ද්‍රව්‍ය සෑදීමට උපයෝගී කර ගනු ලැබූ උපකරණ තොගයක් සහ පුද්ගලයින් දෙදෙනෙකු අද (11) අත්අඩංගුවට ගෙන ඇතැයි බණ්ඩාරවෙල පොලීසිය පවසයි.

බණ්ඩාරවෙල ක්‍රේග් වත්ත පදිංචි 41 හැවිරිදි පුද්ගලයෙකු හා හපුතලේ විහාරගල පදිංචි 57 හැවිරිදි පුද්ගලයෙකු මේ සම්බන්ධයෙන් පොලීසිය විසින් අත්අඩංගුවට ගෙන ඇත.

බණ්ඩාරවෙල රථවාහන අංශයේ නිලධාරීන්ට ලැබුණු ව්‍යාජ ලියවිල්ලක් අනුව පරීක්ෂණ සිදු කළ බණ්ඩාරවෙල පොලිසිය මෙම ස්ථානය වටලා හොර ලිපිලේඛන, ව්‍යාජ රබර් සීල් හා එම ලිපි ලේඛන හා රබර් සීල් නිෂ්පාදනයට යොදා ගනු ලැබූ පරිඝණකයක්, ස්කෑන් යන්ත්‍රයක් මුද්‍රණ යන්ත්‍රයක් ඇතුලු උපකරණ තොගයක්ද අත්අඩංගුවට ගෙන තිබේ.

මෙම පුද්ගලයින් දිවයිනේ විවිධ ආයතනවල හා විවිධ පුද්ගලයින්ගේ නම් සදහන් රබර් සීල් සකස්  කර එමගින් විවිධ ලිපි ලේඛන සකස් කර ඇතැයි පොලීසිය පවසයි.

අත්අඩංගුවට ගනු ලැබූ සැකකරුවන් බණ්ඩාරවෙල මහේස්ත්‍රාත් අධිකරණයට ඉදිරිපත් කිරීමට නියමිතය. බණ්ඩාරවෙල කොට්ඨාශ භාර පොලිස් අධිකාරි සුදත් මාසිංහ මහතාගේ උපදෙස් පරීදි බණ්ඩාරවෙල පොලීසියේ නිලධාරීහු මේ පිළිබදව පරීක්ෂණ සිදු කරති.