තායිලන්තයේ හමුදා නිලධාරියකු විසින් දිගින් දිගටම වෙඩි තැබීම නිසා බැංකොක් නුවරට ඊසාන දිගින් පිහිටි නගරයක වැසියන් බොහෝ දෙනෙක් මියගොස් ඇතැයි වාර්තා වේ.

ඔහුගේ මෙම වෙඩි තැබීම අන්තර්ජාලය ඔස්සේ සජීවීව විකාශය කෙරෙමින් තිබූ බවට වාර්තා වන බවද පොලිසිය කියයි.

“තුවක්කුකරුවා ස්වයංක්‍රීය ගිනිඅවියක් යොදගනිමින් හතර අතේ අහිංසකයන්ට වෙඩි තිබ්බා... විශාල පිරිසක් තුවාල ලැබුවා. සමහර අය මැරුණා” යයි පොලිස් ප්‍රකාශකයෙක් ප්‍රංශ ප්‍රවෘත්ති සේවයට පවසා තිබිණ. මියගිය පිරිස 12 කට වැඩිවන බව කියැවෙන නමුත් ගණන තවමත් තහවුරු කර නැත.

බැංකොක් නගරයට ඊසාන දෙසින් පිහිටි කොරාට් නගරයේදී මෙම වෙඩිතැබීම සිදුව තිබේ. තුවක්කුකරුවා සැරයන් මේජර් ජකාපනාත් තොම්මා යයි හඳුනාගෙන තිබේ. හමුදා වාහනයක් සොරාගත් ඔහු යුද ඇඳුමෙන් සැරසී එහි ඡායාරූප සහ වීඩියෝ ද අන්තර්ජාලයට මුදාහැර තිබේ.

වීඩියෝපටවලින් දක්නට ඇත්තේ වෙඩිතැබීමෙන් මහත් කලබලයට පත්වන මිනිසුන් හතර අතේ දිවයන ආකාරයයි. කෙසේ වෙතත් වෙඩි තැබූ තැනැත්තා තවමත් අත්අඩංගුවට ගෙන නැත.

පෞද්ගලික ගිනිඅවි සන්තකයේ තබාගැනීම අතින් ලෝකයේ වැඩිම ප්‍රතිශතයක් හිමි රටවලින් එකක් ලෙස තායිලන්තය සැලකේ. එහෙත් සාමාන්‍ය වැසියන් ඉලක්ක කරමින් මෙවන් ආකාරයේ වෙඩිතැබීම් වාර්තා වන්නේ කලාතුරකිනි.