(නිමල කොඩිතුවක්කු)

මරණ දණ්ඩනය නියම වූ ප්‍රේමලාල් ජයසේකර මහතා පාර්ලිමේන්තු මන්ත්‍රීවරයකු ලෙස දිවුරුම් දීමෙන් පාර්ලිමේන්තු ඉතිහාසයට මකා දැමිය නොහැකි කළු පැල්ලමක් එක්වූ බව විපක්ෂයේ ප්‍රධාන සංවිධායක පාර්ලිමේන්තු මන්ත්‍රී ලක්ෂ්මන් කිරිඇල්ල මහතා කොළඹ දී අද (8) පැවසීය.

මෙරට පාර්ලිමේන්තු ඉතිහාසයේ තබා ලෝක ඉතිහාසයේ වත් මරණ දණ්ඩනයට ලක්වූ  අයකු පාර්ලිමේන්තු මන්ත්‍රීවරයකු ලෙස දිවුරුම් දී නොමැති බවද කිරිඇල්ල මහතා සඳහන් කළේය.

පාර්ලිමේන්තුවට සහ ප්‍රජාතන්ත්‍රවාදයට ලෝකයෙන් ලැබී තිබූ කීර්ති නාමය මෙයින් අහිමි වී ගිය බව ද ඇතුල්කෝට්ටේ පිහිටි සමගි ජන බලවේගය ජනබලවේගයේ මාධ්‍ය හමුවකට එක්වෙමින් ඔහු පැවසීය.

රටට නීති සම්පාදනය කරන උත්තරීතර පාර්ලිමේන්තුවට මරණ දණ්ඩනය නියම වූවකු පත්කිරීම ප්‍රජාතන්ත්‍රවාදය අගය කරන රටේ සියලු දෙනා එක්ව ප්‍රතික්ෂේප කළ යුතු බව ද කිරිඇල්ල මහතා කියා සිටියේය.

සරත් ෆොන්සේකා මහතා සිරගත වූ අවස්ථාවේදී ඔහුට පාර්ලිමේන්තු මන්ත්‍රී ධුරය අහිමි කිරීමට නීති තර්ක මතු කළ පිරිස්ම මරණීය දණ්ඩනය නියම වූ ප්‍රේමලාල් ජයසේකර මහතා පාර්ලිමේන්තු මන්ත්‍රීවරයකු ලෙස දිවුරුම් දීම සාධාරණීකරණය කිරීම ගැන විපක්ෂය කණගාටුවන බවද ඔහු වැඩිදුරටත් පැවසීය. මෙම අවස්ථාව සඳහා පාර්ලිමේන්තු මන්ත්‍රී සරත් ෆොන්සේකා මහතා ද එක්ව සිටියහ.