(සුජිත් හේවාජුලිගේ )

රට පුරා මත්පැන් අලෙවිසල්  විවෘත කර ඇතත්  ඒවායින් ලැබෙන ආදායම  සියයට 60 කින් පමණ අඩුවී ඇතැයි  සුරාබදු දෙපාර්තමේන්තුව පවසයි.

සාමාන්‍ය දිනකදී මත්පැන් අලෙවි සල්වලින් රුපියල් කෝටි 50ක පමණ  ආදායමක් ලැබුණද  දැනට ලැබෙන්නේ රුපියල්  කෝටි 20 කටත් වඩා අඩු  ආදායමක් බව  සුරාබදු දෙපාර්තමේන්තුවේ  උසස් නිලධාරියෙක් පැවැසීය.

ජනතාව අත මුදල් නොමැතිවීම  නිසා මත්පැන් අලෙවිසල් වෙත  ඇදී ඒම  සීමා වීම ආදායම අඩුවීමට  ප්‍රධාන හේතුව බවද හෙතෙම සඳහන් කළේය.

මෙයට අමතරව  පොදු ප්‍රවාහන සේවය නතරවීම, රජයේ සහ පෞද්ගලික ආයතන සේවකයන්  සියලුම දෙනා  සේවය සඳහා නොකැඳවීම, විනෝද ගමන් හා ප්‍රිය සම්භාෂණ  නතර වීම,  මත්පැන්  පාවිච්චිය සඳහා ස්ථානීය  මත්පැන් අලෙවිසල් සහ  අවන්හල්  විවෘත නොකිරීම  මත්පැන් අලෙවිය අඩුවීමට   බලපා ඇති සෙසු හේතු බව  දෙපාර්තමේන්තුව පවසයි.

රට පුරා සියලු මත්පැන් අලෙවිසල් කොන්දේසි සහිතව  පසුගිය  17 වැනිදා විවෘත කෙරිණ.

විවෘත කෙරුණු දින   මත්පැන් අලෙවිසල්වලට  විශාල වශයෙන් ජනතාව රැස්වූ බවත් පසුදින වසා දමාවි යැයි යන සැකයෙන්  ඔවුන් මෙසේ කටයුතු කළ බවත් සුරාබදු නිලධාරීහු පවසති.

මත්පැන් අලෙවිසල්වලට  ජනතාව පැමිණීම  සැලකිය යුතු ලෙස  අඩුවී ඇතැයි මත්පැන් අලෙවිසල්  හිමියන් පවසන බව  ඔවුහු වැඩිදුරටත් සඳහන් කරති.