(ඩී.ජී.සුගතපාල)

ගල්කිස්ස සාන්ත තෝමස් විද්‍යාලීය කණ්ඩායමේ නායකයාට පහරදී තුවාල සිදුකිරීම සම්බන්ධයෙන් පැවති හඳුනාගැනීමේ පෙරට්ටුවේදී සාක්කිකරුවන් හඳුනාගත්  සැකකරුවන් දෙදෙනාගෙන්  එක් සැකකරුවකු ඇප මත මුදා හැරීමට ගාල්ල ප්‍රධාන මහේස්ත්‍රාත් හර්ෂණ කැකුණවෙල මහතා අද (2) නියෝග කළේය.

රුපියල් ලක්ෂය බැගින් වූ ශරීර ඇපයක්  මත සැකකරු මුදා හැරිණි.  

මෙසේ ඇප මත මුදා හරිනු ලැබුවේ අවිඳු තික්ෂණ පතිරණ සහ අම්බලන්ගොඩගේ චින්තක සුදේශ් යන සැකකරුවන් දෙදෙනෙකි.

ගාල්ල මහේස්ත්‍රාත් අධිකරණයේ දී පැවති හඳුනාගැනීමේ පෙරෙට්ටුවේදී සාක්කිකරුවන් තිදෙනා විසින්ම සැකකරුවන් දෙදෙනා හඳුනා ගන්නා ලදී.

සැකකරු අධිකරණයට ඉදිරිපත් කරමින් පොලිසිය කියා සිටියේ අප්‍රියල් 9 වැනි දා ගාල්ල ජාත්‍යන්තර ක්‍රිකට් ක්‍රිඩාංගණයේ දී  ගල්කිස්ස සාන්ත තෝමස් විදුහල සහ ගාල්ල රිච්මන්ඩ් විදුහල අතර පැවති අවසන් තරගයේ දී ගල්කිස්ස සාන්ත තෝමස් විදුහල ලකුණු 11 කින් ජයග්‍රහණය කිරීමත් සමඟ 150 ක පමණ පිරිසක් ක්‍රිඩාංගණයට කඩාපැන ඇති බවයි.

පසුව ජයග්‍රාහි සාන්ත තෝමස් කණ්ඩායම ක්‍රීඩා මණ්ඩපය  වෙත එමින් සිටියදී කලහකාරි පිරිස ඔවුනට පහරදීමට පටන් ගෙන ඇති බවත් එහිදී කණ්ඩායමේ නායකයා වූ සිතාර හපුහින්න යන අය  කොටු වී තිබෙන අතර ඔහුට අතින් පයින් සහ කොඩි කණුවලින් පහරදී ඇති බවත් පොලිසිය වැඩිදුරටත් කියාසිටියේය.

පහරදීම සම්බන්ධයෙන් සාන්ත තෝමස් කණ්ඩායමේ නායකයා පැමිණිලි කිරීමෙන් පසු පරීක්ෂණ පැවැත්වූ පොලිසිය විමර්ශන පවත්වා මෙම සැකකරු අත්අඩංගුවට ගෙන අධිකරණයට ඉදිරිපත් කළේය.

සිද්ධියට සම්බන්ධ අනෙකුත් සැකකරුවන් ද අත්අඩංගුවට ගෙන අධිකරණයට ඉදිරිපත් කරන ලෙස මෙහිදී මහේස්ත්‍රාත්වරයා පොලිසියට නියෝග කළේය.