(යොහාන් භාසුර)

රට තුළ මේ වන විට ක්‍රියාත්මක නිරෝධායන ඇඳිරිනීතිය හේතුවෙන් ජීවනෝපාය අහිමිවූ කොළඹ දිස්ත්‍රික්කයේ පුද්ගලයන් ලක්‍ෂ 3 ක් රුපියල් 2000 දීමනාව ලැබීමට සුදුසුකම් ලබා ඇති බව කොළඹ දිස්ත්‍රික් ලේකම් ප්‍රදීප් යසරත්න මහතා පැවසීය.

මීට පෙර නිරෝධායන ඇඳිරිනීතිය පැනවූ අවස්ථාවේදී රජය ලබාදුන් රුපියල් 5000 දීමනාව කොළඹ දිස්ත්‍රික්කයේ පුද්ගලයන් 450,000 ක් පමණ ලබාගත් ද මෙවර සමෘද්ධි, වැඩිහිටි සහ ආබාධිත ආදි වෙනත් දීමනා ලබන පුද්ගලයන් ඉවත්කර ඇතැයි ද කී ප්‍රදීප් යසරත්න මහතා වෙනත් කිසිඳු දීමනාවක් නොලබන පුද්ගලයන් පමණක් 2000 දීමනාව ලැබීමට සුදුසුකම් ලබන බවත් සඳහන් කළේය.

‘කොවිඩ්’ වයිරසය පළමුවෙන්ම හදුනාගත් කොළඹ දිස්ත්‍රික්කයේ පවුල් 558,000 ක් තුළ ලක්‍ෂ 24 ක ජනතාවක් වෙසෙන බවත් කොළඹ නගර සභා සීමාව තුළ පමණක් ලක්‍ෂ හයක පමණ පිරිසක් ජීවත් වන බවත් ප්‍රදීප් යසරත්න මහතා කීය.

(ඡායාරූප: ශාන්ත රත්නායක)