(හර්ෂණ තුෂාර සිල්වා, බිඟුන් මේනක ගමගේ සහ තරිඳු ජයවර්ධන)

රටේ පවතින තත්ත්වය සම්බන්ධයෙන් මෙරට සිටින තානාපතිවරුන් සහ මහකොමසාරිස්වරුන් සමඟ මේ වනවිටත් සාකච්ඡා ආරම්භ කර ඇතැයි ඒකාබද්ධ විපක්ෂයේ පාර්ලිමේන්තු මන්ත්‍රී දිනේෂ් ගුණවර්ධන මහතා අද (27) පස්වරුවේ පැවැසීය.

ඇමෙරිකා එක්සත් ජනපද රාජ්‍ය දෙපාර්තමේන්තුව ආණ්ඩුක්‍රම ව්‍යවස්ථාවට අනුකූලව කටයුතු කරන්නැයි ඉල්ලා තිබුණු බවත් මහින්ද රාජපක්ෂ  අගමැතිවරයාගේ ප්‍රධානත්වයෙන් යුත් නව අන්තර්වාර ආණ්ඩුවේ ඉදිරි කටයුතු සම්බන්ධයෙන් තානාපතිවරුන් සහ මහකොමසාරිස්වරුන් දැනුවත් කිරීමට කටයුතු කරන බවත් හෙතෙම කීය.

කොළඹ පදනම් ආයතනයේ අද (27) පස්වරුවේ පැවැති මාධ්‍ය හමුවකදී අදහස් දක්වමින් ගුණවර්ධන මහතා එම කරුණු කීවේය.

එහිදි ඔහු මෙසේ ද කීය.

“අපි තානාපතිවරුන් සහ මහකොමසාරිස්වරුන් සමඟ සාකච්ඡා ආරම්භ කර තිබෙනවා. ජාත්‍යන්තර මූල්‍ය අරමුදලේ නිලධාරීන් සමඟ සාකච්ඡා පවත්වනවා. ජාත්‍යන්තර මූල්‍ය අරමුදලෙන් අපට තවත් ණය වාරිකයක් ලැබෙන්න තිබෙනවා. ජාත්‍යන්තර මූල්‍ය අරමුදල ශ්‍රී ලංකාවේ ආර්ථිකය සම්බන්ධයෙන් බලා සිටිනවා. අපි ඔවුන් සමඟ සාකච්ඡා කර ඉදිරි පියවර ගන්නව”.

ජාත්‍යන්තර මූල්‍ය අරමුදල 2016 වසරේ ජූනි මාසයේදී ශ්‍රී ලංකාවට එක්සත් ජනපද ඩොලර් බිලියන 1.5ක ණය මුදලක් අනුමත කළ අතර පසුගිය සැප්තැම්බර් මාසයේදී ජාත්‍යන්තර මූල්‍ය අරමුදලේ දූත පිරිසක් ශ්‍රී ලංකාවේ සංචාරයක නිරත වෙමින් මූලික නිරීක්ෂණ ඉදිරිපත් කළේය.

මේ වසරේ ජූනි මාසයේදී අන්තර්ජාතික මූලය අරමුදල අවසන් වරට ශ්‍රී ලංකාවට ඇමරිකානු ඩොලර් මිලියන 252ක මුදලක් නිදහස් කළේය.