වසර 18ක ගැටුම් අවසන් කරමින් ගිවිසුමකට පැමිණීම සඳහා ඇමෙරිකා එක්සත් ජනපද බලධාරීන් සහ තලේබාන් සංවිධානයේ සාමාජිකයන් අතර එකඟතාවක් ඇති වී ඇතැයි සාකච්ඡාවලට සම්බන්ධ වී සිටින ඉහළ පෙළේ ඇමෙරිකානු නිලධාරියෙක් පැවැසීය. 

දින අටක් මුළුල්ලේ පැවැති සාකච්ඡා අවසානයේදී දෙපාර්ශවය අතර මෙම එකඟතාව ඇති වී තිබේ. කටාර් රාජ්‍යයේ දෝහා නුවරදී මෙම සාකච්ඡා පැවැති අතර දෙරට අතර ගිවිසුමකට අත්සන් තැබුණහොත් ඇමෙරිකානු හමුදා ඇෆ්ගනිස්තානයෙන් නික්මෙනු ඇතැයි පැවසේ.

මේ වනවිට ඇමෙරිකානු සෙබළු 13,000ක් ඇෆ්ගනිස්තානයේ රැඳි සිටිති. ඔවුන්ගේ සංඛ්‍යාව අඩු කිරීමට ඇමෙරිකාව එකඟත්වය පළකර තිබෙන අතර ඒ වෙනුවෙන් ආරක්ෂාව සම්බන්ධයෙන් සහතිකයක් දීමට තලේබාන් සංවිධානය එකඟතාව පළ කර තිබේ.

“අපි ගිවිසුමට අත්සන් කරන්න ඔන්න මෙන්න ඉන්නේ. ගිවිසුම අත්සන් කළාම ප්‍රචණ්ඩත්වය අඩුවේවි. ඒ වගේම තිරසර සහ ගෞරවාන්විත සාමයක් උදෙසා සාකච්ඡා කිරීමට ඇෆ්ගනිස්තානයට අවස්ථාව උදා වේවි” යැයි ඇෆ්ගනිස්තානය වෙනුවෙන් පත්කර සිටින ඇමෙරිකාවේ විශේෂ නියෝජිත සල්මේ කලීල්සාද් පැවැසීය.  

මේ සම්බන්ධයෙන් සාකච්ඡා කිරීමට තමන් ඇෆ්ගනිස්තානයට යන බව ද හෙතෙම කීවේය. ඇෆ්ගනිස්තානයේ දී සල්මේ කලීල්සාද් එරට නායකයන් සහ නිලධාරීන් සමඟ සාකච්ඡා කරනු ඇතැයි ඇමෙරිකා එක්සත් ජනපද රාජ්‍ය දෙපාර්තමේන්තුවේ ප්‍රකාශකයා කීය. 

2001 සැප්තැම්බර් 11 වැනිදා ඇමෙරිකාවට එල්ල වූ ත්‍රස්ත ප්‍රහාරවලින් පසුව ඇමෙරිකානු හමුදා මුල් වරට ඇෆ්ගනිස්තානයට යවන ලදී. අල්කයිඩා සංවිධානය එම ප්‍රහාර එල්ල කළ අතර තලේබාන් සංවිධානයේ සහාය හිමිවුණු බව ද පැවසිනි. අල්කයිඩා සංවිධානයේ හිටපු නායකයා වූ ඔසාමා බින් ලාඩන් තලේබාන් සංවිධානයේ සහාය ඇතිව ඇෆ්ගනිස්තානයේ සැඟවී සිටි බව ද පැවැසුණි.

ඇෆ්ගනිස්තානය තුළ කෙරෙන ඇමෙරිකානු හමුදා මැදිහත්වීම් අවසන් කිරීමට ඇමෙරිකානු රජයට වුවමනා වී තිබේ. ඇමෙරිකානු හමුදා මෙතරම් දීර්ඝකාලයක් මුළුල්ලේ රැඳී සිටින එකම විදේශය වන්නේ ද ඇෆ්ගනිස්තානයයි. 

ඇමෙරිකානු නිලධාරීන් සහ තලේබාන් සංවිධානයේ සාමාජිකයන් අතර සාකච්ඡා ආරම්භ වූයේ 2018 වසරේදීය.

සැප්තැම්බර් 1 වැනිදාට ප්‍රථම ගිවිසුම සකසා අවසන් වනු ඇතැයි ඇමෙරිකානු රාජ්‍ය ලේකම් මයික් පොම්පෙඕ පැවසීය. ඇෆ්ගන් මැතිවරණය මේ මස අගදී පැවැත්වීමට නියමිත අතර ඇමෙරිකානු ජනාධිපතිවරණය ලබන වසරේ දී පැවැත්වීමට නියමිතය. ඒ සියල්ලට කලින් මෙම ගිවිසුම් සකසා අවසන් කිරීමට දෙපාර්ශවය බලාපොරොත්තු වන බව පැවසේ.

 
“ගිවිසුම සකසා අවසන් කිරීමට නියමත” යැයි දෝහා නුවර සිටින තලේබාන් සංවිධානයේ ප්‍රකාශක සුහයිල් ෂහීන් කීවේය.

ඇමෙරිකාව සිය හමුදා ඇෆ්ගනිස්තානයෙන් ඉවත් කරගැනීමත් තලේබාන් සංවිධානය ආරක්ෂාව සහ ඇෆ්ගනිස්තානය ජිහාද්වාදීන්ගේ ආරක්ෂිත නිවහනක් ලෙස භාවිත නොකිරීම තහවුරු කිරීම යන කරුණු කෙරෙහි ගිවිසුමෙන් වැඩි ප්‍රමුඛත්වය දෙන බව කියැවේ.  

එමෙන්ම ඇෆ්ගන් රජය සහ තලේබාන් සංවිධානය අතර සාකච්ඡා මෙන්ම දෙපාර්ශවය අතර සටන් විරාම ගිවිසුමකට අත්සන් කිරීම සම්බන්ධයෙන් එහිදි අවධානය යොමුවනු ඇත. 


ඒ.එෆ්.පී. ඇසුරිනි 

055