• ජී.ඇල්.ට-මෛත්‍රීට-නිමල්ට ඇමැතිධූර
• දිවුරුම් දීම සිකුරාදා
• ඇමැතිවරුන්ගේ  විෂය පථය වෙනස් වෙයි

(අජන්ත කුමාර අගලකඩ) 

නව ආණ්ඩුවේ කැබිනට් මණ්ඩලය ලබන සිකුරාදා (14) දිවුරුම් දීමට නියමිත බව රජයේ ආරංචිමාර්ග සඳහන් කරයි. 

නව කැබිනට් මණ්ඩලය ඇමැතිවරුන් 26 දෙනකුට සීමා වෙන අතර, එම ඇමැතිවරුන්ගේ හා ඔවුන්ට පැවරෙන විෂය පථ වෙන් කිරීමේ කටයුතු මේ දිනවල සකස් කරමින් පවතින බව රජයේ ආරංචිමාර්ග සඳහන් කරයි. 

අගමැති මහින්ද රාජපක්‍ෂ මහතා අද (09) පෙරුවරුවේ කැලණිය රජමහා විහාරයේදී ජනාධිපති ගෝඨාභය රාජපක්‍ෂ මහතා ඉදිරියේ අග්‍රාමාත්‍ය ධුරයේ දිවුරුම් දීමට නියමිත අතර, නව කැබිනට් මණ්ඩලය ලබන සිකුරාදා මහනුවර මඟුල් මඩුවේදී දිවුරුම්දීමට නියමිතව ඇති බව පැවසේ. 
ශ්‍රී ලංකා පොදුජන පෙරමුණේ සභාපති මහාචාර්ය ජී.එල්. පීරිස් මහතා නව ආණ්ඩුවේ විදේශ කටයුතු සහ ආණ්ඩුක්‍රම ව්‍යවස්ථා කටයුතු ඇමැතිවරයා ලෙස පත් කෙරෙනු ඇතැයි දැනගන්නට තිබේ. 
ගෝඨාභය රාජපක්‍ෂ මහතා 
ජනාධිපතිධු​රයේ දිවුරුම් දීමත් සමග පත් කෙරුණු 15 දෙනකුගෙන් යුත් කැබිනට් මණ්ඩලයේ ඇමැතිවරුන්ගේ විෂය පථ රැසක් මෙවර වෙනස් වෙනු ඇතැයි රජයේ ආරංචිමාර්ග කියයි. 

කැබිනට් මණ්ඩලයට​ ජ්‍යෙෂ්ඨයන්ට අමතරව අලුත් මුහුණු කීපයක්ද එක්වෙනු ඇති බවත්, ශ්‍රී ලංකා නිදහස් පක්‍ෂයට ද කැබිනට් ඇමැතිධුර දෙකක් හෝ තුනක් හිමිවෙනු ඇති බවත් එම ආරංචිමාර්ග කියයි. 

එහිදී හිටපු ජනාධිපති මෛත්‍රීපාල සිරිසේන මහතාටද, නිමල් සිරිපාල ද සිල්වා මහතාටද කැබිනට් ඇමැතිධුර හිමිවීමට නියමිතව ඇත. 
මේ අතර, පසුගිය කැබිනට්ටුවේ නොසිටි පක්‍ෂ නායකයන් කිහිපදෙනකුද මෙවර කැබිනට් මණ්ඩලයට ඇතුළත්වනු ඇතැයි පැවසේ. 

19 වැනි ආණ්ඩුක්‍රම ව්‍යවස්ථා සංශෝධනය අනුව, කැබිනට් මණ්ඩලය ඇමැතිවරුන් 30 කට සීමා වෙන නමුත්, මෙවර කැබිනට් මණ්ඩලය ඇමැතිවරුන් 26 දෙනකුට පමණක් සීමාවෙනු ඇති බවද වාර්තාවේ. 
මේ අතර, රාජ්‍ය හා නියෝජ්‍ය ඇමැතිවරුන් දිවුරුම් දීම ලබන සතියේ සිදුවනු ඇත.