කොරෝනා වයිරසය මේ වන විට ලොව පුරා මිලියන 4.35කට වැඩි පිරිසකට ආසාදනය වී ඇති අතර 297 000 ක පමණ පිරිසක් මියගොස් ඇත. වයිරසයෙන් සුවවූ සංඛ්‍යාව මිලියන 1.55ක් වේ.

ලෝකයේ රටවල් අතරින් වැඩිම මරණ සංඛ්‍යාවක් සහ ආසාදිතයින් සංඛ්‍යාවක් වාර්තා වන්නේ ඇමරිකාවෙන් වන අතර එහි සිදුවූ මරණ සංඛ්‍යාව 84 763කි. ඇමරිකාවේ කොරෝනා වයිරස රෝගීහු මිලියන 1.42ක් සිටිති.

දෙවැනියට වැඩිම රෝගීන් වාර්තා වන්නේ රුසියාවෙනි. රුසියාවේ කොරෝනා ආසාදිත රෝගීන් 242 000ක් පමණ තහවුරු වී ඇති අතර මරණ 2 212ක් සිදුවී තිබේ.

එක්සත් රාජධානියේ සිදුවී ඇති මරණ සංඛ්‍යාව 33 186කි. පසුගිය පැය 24 තුළ මරණ 494ක් සිදුවී ඇති බව එරට සෞඛ්‍ය අමාත්‍යාංශය පවසයි. එංගලන්තයේ අගුළු දැමීම තාවකාලිකව ලිහිල් කිරීමට පටන්ගත් අතර නිවසේ සිට රාජකාරි කළ නොහැකි අයට රැකියාවට යන ලෙස සඳහන් කර තිබේ.

මහා බ්‍රිතාන්‍යයේ, එංගලන්තය හැර සෙසු කොටස් තවමත් වසා දමා තිබේ.

සමස්ත ස්පාඤ්ඤ ජනගහනයෙන් 5%කට පමණ කොරෝනා වයිරසය ආසාදනය වී ඇතැයි එරට සෞඛ්‍ය අංශ පවසයි. ඒ අනුව ස්පාඤ්ඤයේ මේ වනවිට කොරෝනා රෝගීහු 229 000ක් සිටිති. මරණ 27 104ක් සිදුවී තිබේ.

ඉතාලියේ රෝගීන් 222 000ක් තහවුරු වී ඇති අතර 31 106ක් මියගොස් තිබේ.


(රොයිටර් ඇසුරිණි - 085)