(ජේ.කේ.එල්. චාමින්ද)

ඛනිජතෙල් නීතිගත සංස්ථාවට අයත් මාගාල්ල තෙල් ගබඩාවේ සේවය කරන  රියදුරෙකු ඇතුළු සේවකයින් දෙදෙනෙකු  නිවෙස්වල ස්වයං නිරෝධායනයට ලක්කොට ඇති අතර අද (27) ඔවුන් පි. සි.ආර් පරීක්ෂණයට ලක්කිරිමට නියමිතව ඇති බව ගාල්ල වරාය පොලිසිය පවසයි.

තෙල්ගබඩාවේ සේවය කරන  සේවකයින් ගමන්ගත් කැබ් රථයක වැලිසර නාවික කඳවුරේ රාජකාරිකොට  නිවෙස්බලා යමින්  සිටි නාවික සෙබලුන් දෙදෙනෙකු ගමන්කොට ඇති බව පොලිසිය කියයි.

මින් එක් නාවික සෙබලෙකුට කොරෝනා වයිරසය ආසාදනය වි ඇති නිසා  මාගාල්ල තෙල් ගබඩාවේ සේවය කරන සේවයකයින් තිදෙනා පි. සි.ආර් පරික්ෂණයට  යොමුකිරීමට කටයුතු කරඇති බවද පොලිසිය පවසයි.

තෙල්ගබඩාවේ සේවය කරන සේවකයින් තිදෙනා  රාජකාරි කටයුත්තක් සඳහා   සංස්ථාවට අයත් කැබ් රථයකින් බෙලිඅත්තට යමින් සිටියදි  නාවික සෙබලුන් දෙදෙනා පින්නදුව අධිවෙගි පිවිසුමේ දී මෙම කැබ්රථයට නංවාගෙන ඇත.

මාගාල්ල තෙල් ගබඩාවේ සේවය කරන රියදුරු හා සේවකයින් තිදෙනා  ඉමදුව ගොනාමුල්ල හා හපුගල යන ප්‍රදේශවල පදිංචිකරුවන්  බවද පොලිසිය පවසයි. 

මාගාල්ල තල්ගබඩාව විෂබිජ හරණයට ලක්කළ බව ගාල්ල වරාය පොලිසියේ ස්ථානාධිපති දුමින්ද කුමාර මහතා පවසයි.

සෞඛ්‍ය වෛද්‍ය නිලධාරිගේ හා මහජන සෞඛ්‍ය පරික්ෂකවරුන්ගේ  අධික්ෂණය යටතේ මොවුන් ස්වයං නිරෝධායනයට ලක්කොට ඇති බවද පොලිස් ස්ථානාධිපතිවරයා පවසයි.