ඉතාලියේ වෙසෙන ශ්‍රී ලාංකිකයන් විසින් පවත්වනු ලබන මංගල්‍යයන් අතුරින් තවත් සුවිශේෂී මංගල්‍යයකි. සිසිලියේ සිරකුසා නගරයේ පවත්වන කඳුළේ දේව මාතාවන්ගේ වාර්ෂික මංගල්‍යය. මෙවර ද එම මංගල්‍යය අගෝස්තු 15 වන දින සිදු කරනු ලැබීය. සිරකුසා කතෝලික සංඝයේ ආත්මික එඬේරාණන් වන ගරු සචිත ප්‍රනාන්දු පැ.තු.නි. පියතුමාගේ සහ දහම් සේවා සභාවේ සංවිධානයෙන් සිදු කෙරුණු මෙහි මුලසුන ගත්තේ රෝමයේ ඉගෙනුම ලබන ගරු සම්පත් සුජීව පියතුමාණන් විසිනි. මෙයට සිරකුසා, මෙසිනා, කතානියා, කල්‍තජිරෝනෙ වැනි ප්‍රධාන නගරවලින් මෙන්ම සෙසු නගරවලින් ජනතාව සහ සිරකුසා බෞද්ධ විහාරයේ විහාරාධිපති ද සහභාගි වූහ.   
මෙම දේව මාතාවන්ට කඳුළේ මෑණියෝ යන විරුදාවලිය ලද්දේ කෙසේ දැයි විමසා බැලුවොත් සිරකුසා නගරයේ Angelo Lannuso සහ Antonina Lucia නමැති විවාහක යුවළකට දරුවන් නොමැති සොවින් බොහෝ දුකින් ජීවත් වී ඇත. මේ කාන්තාව කඳුළු සලමින් ජීවත් වී ඇත. ඔවුන්ගේ නිදන කාමරයේ ඇඳ ඉස්මත්තේ දේව මාතාවන්ගේ පින්තූරයක් එල්වා තිබී ඇත. 1953 අගෝස්තු මස 29, 30, 31 සහ සැප්තැම්බර් පළමු වැනි දින මෙම පින්තූරයෙන් කඳුළු ගලා ගොස් ඇත. පසුව කරන ලද පරීක්ෂණවලදී මෙය මිනිස් ඇසකින් ගලා ගිය කඳුළු බවට පිළිගෙන, ඉන් වසර 50 කට පසුව එනම් 1994 දී දෙවන ජුවාම් පාවුලු පාප් වහන්සේ විසින් මෙම පින්තූරය ආසිරි ගන්වා දැන් තැන්පත් කර ඇති නව දේවස්ථානයේ තැන්පත් කර ඇත.

කාන්ති රතුගමගේ