(මීරිගම විශේෂ පුෂ්පකුමාර මල්ලවආරච්චි)

කෙළිදෙලෙන් ගමනේ යෙදුණු තරුණ පිරිසක් බසය නැවතීමේ දී නියමිත නැවතුම්පොළ පසු කළැයි උරණව රියදුරුට පහර දෙන්න සූදානම්ව මගී වීරෝධය මැද  බැස යද්දී  වටිනා ජංගම දුරකතනයක් ද අසුන මත දමා යාමේ සිද්ධියක් ඊයේ 29 උදේ කැලණිය පට්ටිය හන්දිය ප්‍රදේශයේ දී දකගත හැකිවිය.

දෙහිඅත්තකණ්ඩිය සිට කොළඹ බලා ගමන් කරන පෞද්ගලික බස් රථයකි. මගී ආසන සියල්ලම පාහේ පිරී තිබිණි. තරුණ පිරිසක් ගමන් ගත්තේ අල්ලාප සල්ලාපයේ යෙදෙමිනි. ඔවුන් අත නවීන පන්නයේ ජංගම දුරකතන ද විය. ඒවායින් මේ පිරිස විවිධ ක්‍රීඩාවල යෙදී සිටිනු දැකිය හැකිවිය.

බසය කැලණිය පට්ටිය හන්දිය පසු කරන්නට විය. එක් තරුණයෙක් එක්වරම නැගී සිටියේ නින්දෙන් අවදීවුවකු විලසය. බහිනවා බහිනවායී ඔහු මොරදුන්නේය. එම කෑගැසීමත් සමඟම තරුණයන් සිව් දෙනා නැගිට්ටේ කලබලයෙනි. එක් අයෙකු අත සුරතල් මසුන් සහිත පොලිතින් කවරයක්ද විය. හදිසි කලබලයත් සමග එම කවරය ආසනයක ගැටීමෙන් පුපුරා යද්දී සුරතල් මසුන් සීසිකඩ විසිර ගියේය.

තරුණයන්ගේ දැනුදීම අනුව රියදුරා බසය නතර කරද්දී නැවතුම්පොළ මදක් පසුවී තිබිණි. එය තරුණ පිරිසගේ කෝපයට හේතුවිය. පිරිස බසයෙන් බැසීම පසෙකලා රියැදුරු සමීපයට ගියේය. අතින් පයින් හොඳ සංග්‍රහයක් කරන්නට සැරසෙද්දී සෙසු මගීන්ගේ විරෝධය එල්ලවිය. ඒ නිසා තරුණ පිරිසේ අදහස් ව්‍යර්ථවී මගීන්ගේ සංග්‍රහයක් ලැබෙන්නට පෙර බසයෙන් බැස ගියේය.

තරුණ පිරිස ගමන් ගත් ආසනයක තිබී නවීන පන්නයේ දුරකතනයක්  මගියකුට හමුවී එය රියැදුරාට බාර කළේ සිද්ධිය පිළිබඳව පොලිසියට පැමිණිල්ලක් කරන ලෙසට ද උපදෙස් දෙමිනි.