පෙම්වතුන්ගේ දිනය දා කේක් බෙදන්න ගිහින් පෙම්වතිය අහිමි කරගත් පෙම්වතකු පිළිබඳ පුවතක් අගනුවරින් වාර්තා වේ. ඒ මෙසේය.


 ඔහු නාඹර තරුණයෙකි. දුර බැහැර සිට අගනුවරට දිනපතා ළඟාවන බස් රථයකි. රැකියාවට පැමිණෙන අතර එම බසයේම පැමිණි තරුණියක් ඔහුගේ පෙම්වතිය විය. ඔහුට මිතුරෝ විශාල පිරිසක් සිටිති. එයින් පිරිසක් රහමෙර පානය කරති. ඔහු ද මේ කණ්ඩායමේ ප්‍රධාන සාමාජිකයෙකි.


මේ කට්ටිය කුමක් හෝ හේතුවක් හදාගෙන මාසයට වරක් දෙකක් මත්පැන් පානය කරති. බස්රථය තුළ සින්දු කියමින් ගමන් කරති. පෙම්වතාගේ මේ හැසිරීම සම්බන්ධයෙන් ඇය නොසතුට පළ කර තිබුණි. ඔහු හැමදාම ඇයට විහිළුවක් කර ෂේප් වන්නේය.


පසුගිය පෙම්වතුන්ගේ දිනය දා මිතුරන් සමග සෙට් වී සිටින විට මිතුරෙකු පැවසුවේ ‘මචං අද වැලන්ටයින් දිනය ඉතිං උඹ අපිට කේක් අරන් දීපං උඹල දෙන්න හැමදාම ටොපි ටොක්ලට් කනවානේ.’


 ඔහු මිතුරාගේ කන්දොස් කිරියාව නිසා අසල කඩයකින් අයිසින් කේක් එකක් ගෙන කෑලිවලට කපාගෙන පැමිණියේය. එම කේක් එක කෑමට මිතුරෝ පොර අල්ලති. ඔහු මිතුරන්ට බැණවදිමින් කෙල්ලට දීලා තමයි උඹලට දෙන්නේයි කීය. 


අගනුවරින් බසය ගමන් අරඹා තිබුණි. පෙම්වතා ඉදිරිපස ආසනයක වාඩි වී සිටින තම පෙම්වතියට මුලින්ම කේක් කෑල්ලක් පිරිනැමීය. ඒ වනවිට පෙම්වතා  බස්රථය තුළ කරන විකාරරූපී රංගනය ගැන කලකිරීමටත් කෝපයටත් පත්ව සිටි ඇය කේක් කෑල්ල ප්‍රතික්ෂේප කළාය. ඔහු තරහෙන් සිටි පෙම්වතියට විහිළුවක් කරමින් අසල ආසනයක සිටි ආච්චිට කේක් කෑල්ලක් පිරිනැමීය දිගටම තරුණයාගේ හැසිරීම බලා සිටි ආච්චි ඔහුට හොඳටම බැණ වැදුනාය.


අපි මේ බලාගෙන ඉන්නේ ගෙදර යන්නේ කොයිවෙලේ ද කියලා? මුන් මේකේ ජවුසං නටනවා. කියමින් තරුණිය දෙස බැලුවාය. ඇය ලැජ්ජාවෙන් බිම බලාගත්තාය. මේ කතා ඇසූ පෙම්වතා පරාජිත හැඟීමෙන් මිතුරන්ට පැවසුවේ මංච දැන් ඉතිං කරන්න දෙයක් නැහැ මේක අපි කමු. යනුවෙනි. 


වේගයෙන් ධාවනය වන බසය තුළ ඔහු එහාට මෙහාට තල්ලු වෙමින් පිටුපසට ගියේ අතේ කේක් ගෙඩිය ද ඔසවාගෙනය. එක්වරම බසය බ්‍රේක් ගැසුවේය. ඔහු පියාඹන පිරිසියක් මෙන් උඩින් ගොස් පිටුපස ආසනයේ සිටි මිතුරන් මතට ඇද වැටුනේ කේක් ගෙඩිය ද සීසීකඩ වීසිවෙමිනි.


මිතුරන්ගේ ඇඟ පුරාම අයිසින් කේක්ය. මිතුරා හරියට  අවුරුදු උත්සවයක  විකටයෙකු සේ මුහුණ පුරා අයිසින් තවරාගෙන පිටුපස ආසනය මත ඇද වැටිලාය. මුලු බසය පුරාම සිනාවක් පැතිරිණි. මේ සිනා හඬ මැද්දේ තම පෙම්වතාට වෙලා තිබෙන සන්තෑසිය දැක පෙම්වතිය තරහෙන් පුපුරා මගින් බැස ගියාය.


පසුව මිතුරන් පිරිස එකතු වී ඔහු පිරිසුදු කර බහින ස්ථානයෙන් බස්සවා ඇත. තම මිතුරාත් පෙම්වතියත් සති ගණනාවක් යනතුරු එම බසයේ පැමිණියේ නැති නිසා මිතුරන් ඒ ගැන සොයා බලා ඇත. තම මිතුරා පවසා ඇත්තේ ඉලව් වැලන්ටයින් දිනයක් නිසා තමාට පෙම්වතිය ද අහිමි වූ බවය.
(බන්දුල පතිරණ)