ජීවන ගමනේ අඩසියවසට පැමිණි ව්‍යාපාරිකයකුගේ උපන්දින සාදයකි. පැවතුණේ ගෙවුණු වසරේ අග සතියේ දිනකය. දන්නා අඳුනන අය මෙන්ම අසල්වාසීහුද මේ සැමරුම් උත්සවයට ආරාධනා ලැබ සිටියහ. තෑගිබෝග පාර්සල් රැගෙන ආ ආරාධිතයෝ ව්‍යාපාරිකයාට දිගාසිරි පතා සුභ පැතූහ. පැමිණි පිරිස දිවා ආහාරයෙන්ද සප්පායම් වී ආපසු ගියේ සතුටිනි. ව්‍යාපාරිකයා සැඳෑවේ බිරිය හා දරුවන් සමග ත්‍යාග පරීක්‍ෂා කරන්නට විය. රුපියල් දහස දෙදහස වටිනා ත්‍යාග පාර්සල් අතරේ පුංචි පාර්සලයක්ද තිබිණි. එහි වූයේ කුඩා දරුවන් සඳහාම වෙන්වූ සුවඳ සබන් කැට දෙකකි. ඒ පාර්සලයේ සුභ පැතුම් පතක්ද විය. ”සුභ උපන් දිනයක් වේවා”. ඔබ තවමත් මගේ චූටි පුතාමයි. මීට අම්මා යනුවෙන් එහි සඳහන් විය. ව්‍යාපාරිකයාගේ අම්මා මේ අවස්ථාවට සහභාගී නොවුවත් මවට ආරාධනා නොකිරීම පිළිබඳව උරණවූ අසල්වැසියන් මේ ත්‍යාගය දී ඇතැයි පසුව හෙළිවිය. ආ මාමේ බේබි සබන් ගෑවාදැයි ගමේ දරුවන් ඔහුගෙන් අසද්දී මුවෙන් නොබැණ දැන් කාලය ගත කරන්නේ සිය මව අමතක කිරීමෙන් සිදුවූ අවනම්බුව එයින්වත් වසා ගන්නා අටියෙනි.