අනුරාධපුර පන්ඩුලගම ප‍්‍රදේශයේ වෙළෙඳ ව්‍යාපාරිකයකුගේ නිවෙසකට ඇතුළු වූ සොරෙක් එහි තිබී මුදල් විදුලි උපකරණ හා තවත් භාණ්ඩ කිහිපයක් සතිදෙකකට පමණ පෙර රැගෙන ගියේය.සොරකම කිසිවකුටත් අසු නොවූ නිසා ඔහු නැවත වරක් රාත‍්‍රී කාලයේ ඒ නිවෙසට ඇතුළු වූයේ තවත් සොරකමක් කිරීමටය.ව්‍යාපාරිකයාගේ නිවෙස තුළ තිබූ යම් භාණ්ඩ කිහිපයක් අඩු වී ඇති බව තේරුම්ගත් ව්‍යාපාරිකයා සොරා අල්ලා ගැනීමට උපක‍්‍රමයක් යෙදීය. වට පිටාවේ අසල්වැසියන් සමග සැඟවී සිටි ව්‍යාපාරිකයාට තම නිවෙසට පුද්ගලයෙකු ඇතුළු වූ බව පෙනිණ.ඔහු ඒ බව වහාම පොලීසියට දැනුම් දුන්නේය. පොලිස් කණ්ඩායමක් කඩිනමින් එවන්නේ යැයි නිලධාරියෙක් ව්‍යාපාරිකයාට දැනුම් දී උපදෙස් දුන්නේ අසල්වැසියන් සමග නිවෙස වටලාගෙන සිටින ලෙසයි.ව්‍යාපාරිකයා එය අකුරටම ඉටුකළේය.පොලිසිය නිවෙසට ගොස් සොරා අල්ලා ගැනීමේ මෙහෙයුම ක‍්‍රියාත්මක කළේය. අසල්වාසීන් නිවෙස වටකරගෙන සිටියදී පොලීසිය නිවෙසට ඇතුළුවිය. නිවෙස ඇතුළත සෝදිසි කළත් සොරා නොසිටි අතර වැඩිදුරටත් සිදු කළ පරීක්‍ෂාවේදී දුටුවේ වහලේ සිවිලිම මත සොරා වකුටු වී සිටි අයුරුයි.සොරා අත්අඩංගුවට ගත් පසු ඔහුගෙන් කළ ප‍්‍රශ්න කිරීමේදී අනාවරණය වූයේ මුල්වතාවේ සොරකමෙන් පසු දෙවැනි වරට ආවේ නිවසේ තිබූ ගෘහ භාණ්ඩ රැගෙන යාමට බවයි.ව්‍යාපාරිකයාගේ නිවෙස පිහිටා තිබුණේ ගමේ වැව ඉස්මත්තේය. වැවේ තිබූ ඔරුවක් පැදගෙන මේ පුද්ගලයා සොරකමට පැමිණ ඇති බවද හෙළිවිය.