ඒ හැටි උගත්කමක් නැති එදිනෙදා කුළියක් කර ජීවත්වන ඔහු සිය කුඩා මිණිබිරියට දැක්වූවේ අසිමිත ආදරයකි. දැරියට හදිසියේ ඇති වූ උණ රෝගයක් හේතුවෙන් ප‍්‍රතිකාර ගැනීම සඳහා ගමේ රෝහලට රැගෙන ගියාය.

දැරියට වැළඳී ඇත්තේ මැලේරියා රෝගය යයි සැක සිතු වෛද්‍යවරයා ඇගේ ලේ සාම්පලයක් පරීක්ෂා කිරීමට තීරණය කළේය. මෙහිදී ඇතිවූ වේදනාව නිසා දැරිය නොනවත්වාම හැඬීමට පටන්ගත්තා ය. නිවෙසට යන තුරුත් දැරියගේ හැඬීම පැවතිණි.

”මොකද... මොකද...? කෙල්ලේ මේ දරුව මොර දෙන්නේ?” කලබල වූ ඔහු දැරිය වඩා ගනිමින් ඇසුවේය.
දැරියගේ මව ඔහුට සියල්ල පැවැසුවාය.

”මගේ පුංචි එකාගෙ ලේ හොලවන්න එක එකාට එහෙම පුළුවන් ද” මෙයින් දැඩි කෝපයට පත් ඔහු මිදුලට බැස්සේ ”ලේ ගත් පුද්ගලයාට හොඳ පාඩමක් උගන්වමියි” කියමිනි.

මෙම ගාල්ගෝට්ටිය ඇසී අසල්වැසි නිවැසියෝද සීයාගේ නිවෙසට දිව ආහ.

”බලාපල්ල මේ නොදරුවගේ ලේ හොල්ලල”

”ඈ.. මොකාද අප්පේ මේ අපරාදෙ කළේ” මෙහි අගමුල නොදත් ඔවුහු ද විමසූහ.

පසුව කාරණය තේරුම් ගත් අසල්වැසියන් ඔහුගේ ගමන වළක්වමින් ප‍්‍රදේශයේ මැලේරියා රෝගය පැතිරීමේ අවදානමක් නිසා මෙසේ පරීක්ෂා කිරීම් කළ බව පැවසුවේ සිරිසේනගේ සිත නිවීමටය.

”ඒකට ඉතිං මේ නොදරුවගෙන් පළි ගන්න එක හරියැ” ඔහුගේ ගමන වැළකුණත් ඔහුගේ හිතට නම් ඒ හැටි හරිගියේ නැත.