(වියලුව වාර්තාකරු) 
කොරෝනා උවදුරින් ආරක්ෂාවීම සඳහා මීටරයක පරතරයක් පවත්වා ගෙන යෑමට උපදෙස් ලබා දී තිබියදී එය මිලි මීටරයක් දක්වා අඩු කරන්නට ගිය සල්ලාලයකුට ප්‍රදේශයේ මූල්‍ය ආයතනයකදී කාන්තාවකගෙන් බඩ කට පුරා ගුටි බැට කන්නට සිදුවූ පුවතක් වාර්තා වෙයි.


සිද්ධිය මෙසේය.


එදින සති පොළ පැවැත්වෙන දිනයක් වූයෙන් නගරයට පැමිණි විශාල පිරිසක් නගරයේ මූල්‍ය ආයතනවලට එක්රොක් වී සිටියේ තම මූල්‍ය කටයුතු ද එදිනම සිදුකර ගැනීමට පහසුවක් වූ බැවිනි.


ඒ නිසාම කොරෝනා රෝගය පාලනය කිරීම සඳහා පනවා ඇති මීටරේ පරතරය ඉක්මවූ පිරිස පොදිගැසෙන්නට වූයේ සිය කාර්යයන් ඉක්මනින් නිමා කරගෙන ගමට යන එකම බස් රථයෙන් නිවෙස් බලා පිටත්වීමේ අදිටනිනි.


හිටිවනම පිරිස් අතර සිටි කාන්තාවක් මහ හඬින් පරුෂ වචන කියමින් එහි සිටි මැදිවියේ පුද්ගලයකුට අතින් පයින් පහර දෙන්නට පටන් ගත්තේ මූල්‍ය ආයතනය තුළ එතෙක් පැවැති නිහැඬියාව බිඳ දමමිනි.


කාන්තාව එහි තමන් පසුපසින් සිටි පුද්ගලයාට පහර දෙන්නට පටන් ගත්තේ ඔහුගේ බිරිය නිවසේ නැති දැයි ඔහුගෙන් ප්‍රශ්න කරමිනි.


ඇයට ශක්තියක් වීමට එහි සිටි තවත් කාන්තාවන් පිරිසක් ද පෙර කී පුද්ගලයාට බැනවදින්නට පටන් ගත් අතර, තමුන් පැමිණි කටයුත්ත ද අතහැර දැමූ හෙතෙම හෙමින් සීරුවේ මූල්‍ය ආයතනයෙන් පිටව ගියේ එහි සිටි සෙසු පිරිසගේ ද උසුළු විසිළු මැද්දේය.