(වියලුව වාර්තාකරු)
ගමේ පවත්වන වාර්ෂික වැඩසටහනක් සඳහා සකස් කළ බඩු ලැයිස්තුවේ තිබූ අපබ්‍රංස වචනයක් නිසා එහි ප්‍රධාන සංවිධායක අන්දමන්ද වූ බව කියැවෙන පුවතක් ලංකාදීපයට වාර්තා වේ.

 සිද්ධිය මෙසේය

එය ගම්බද ප්‍රදේශයකි. 

දින කිහිපයක් තිස්සේ පැවැත්වෙන වැඩසටහන සඳහා අවශ්‍ය බඩු ලැයිස්තුව පිළියෙළ කිරීම පැවැරුණේ තරුණ පිරිසකටය. 

වගකීම හිස් මුදුනින්ම බාරගත් තරුණ පිරිස දින කිහිපයක් තිස්සේ පැවැත්වෙන මෙම වැඩසටහන සඳහා අවශ්‍ය බොහොමයක් දෑ ලැයිස්තුවකට එක්තැන් කළේ කිසියම් දෙයක් මගහැරුණහොත් එහි වගකීම තමුන්ට එන බව එකිනෙකාට පවසා ගනිමිනි.

 දිග ලැයිස්තුවක් පිළියෙළ කෙරිණි.

 අවසානයේ ලැයිස්තුව ඉදිරිපත් වූයේ ප්‍රධාන සංවිධායක වෙතය. 

 ලැයිස්තුව කිහිපවිටක් ඉහළ සිට පහළට අවධානයෙන් කියවූ හෙතෙම ලයිස්තුවේ එක් තැනක නතර වී කිහිපවිටක්ම නළල රැලි ගන්වමින් එහි කෙටිකර ලියූ අකුරු දෙකක් තේරුම් ගන්නට උත්සාහ කළේ තරුණ පිරිසේ ද අවධානය ඒ වෙත යොමු කරවමිනි.

බැරිම තැන සිය හඬ අවදි කළ හෙතම ලැයිස්තුව සකස් කළ තරුණ පිරිස දෙස බලමින් “මොකක් ද බං මේ “අ” තිතක් “බෝ” තිතක් දෙකයි කියල ලියල තියෙන්නේ” යැයි විමසුවේ පන්සලට අවශ්‍ය මේ අපූරු අඩුවැඩිය කුමක්දැයි සැක හැර දැන ගන්නටය.

තරුණ පිරිසගේ මුවඟ සිනහවෙන් පිරී යන්නට වූ අතර එහි සිටි එක් කටකාර තරුණයකු කියා සිටියේ “අ” තිතක් “බෝ” තිතක් දෙකයි කියල ඔය කෙටියෙන් ලියල තියෙන්නේ අරක්කු බෝතල් දෙකක් කියන එකයි. ඒක අපිට නෙමේ විරිඳුකාරයාට” යැයි ඇඟට පතට නොදැනී පවසද්දී තරුණ පිරිස එක්ව සිනහ වෙද්දී “අනේ උඹල තමා දවසකටවත් මිනිස්සු” යැයි සංවිධායක පැවැසීය.