(උණවටුන ඩි.ජී.සුගතපාල)
ගාල්ල ප්‍රදේශයේ පවුලක පිරිසක් තණමල්විල ඥාති නිවෙසකට නෑගම් ගියහ. තණමල්විල පවුලේ අයද කලකින් පැමිණි ඥාතින් සාදරයෙන් පිළිගෙන උපරිම අයුරින් සංග්‍රහ කිරීමට අමතක නොකළහ. පවුල් දෙකේ තාත්තලා රාත්‍රී  කාලයේ උණුසුම් වෙමින් රට තොට ගැනද දේශපාලනය ගැනද උස් හඬින් කතා කරන්නට වූ අතර අම්මලා කාමරයට වී තම දරුවන් ගැන ආඩම්බරයෙන් කතා කරන්නට වූහ. 

“අපේ දුව නම් කැම්පස් එකේදිම ඔන්න කොල්ලෙක් යාළු කරගෙන ඉන්නවා. හැබැයි දැන්ම කසාද බඳින්න බැරිලු‍. තව ටිකක් කල් ඉන්න ඕනලු‍” ගාල්ලේ මව පැවසුවාය.

“ඒකට ඔන්න අපේ ලොකු එක්කෙනා. රස්සාවකුත් නැති හාදයෙක් යාළුකරගෙන ඉන්නවා. හැබැයි කොල්ලගෙ පැත්තේ අය නම් කැමතියි කියල පණිවුඩයකුත් එවල තිබුණා.” තණමල්විල මව පැවසුවාය. 

මධ්‍යම රාත්‍රියද පසුවන තුරු සුහද සතුටු සාමිචියේ යෙදි සිටි ඥාතින් නින්දට ගියේද මහත් සොම්නසිනි.

පසුදින අවදිවු ගාල්ලේ ඥාතිහු අවට පරිසරය දැකබලා ගැනීමේ අදහසින්  එළියට ගියහ. “බලාගෙන ඇවිදින්නේ සත්තු ඉන්නවා” නිවැසියන්ගෙන් ලැබුණේ අනතුරු හැඟවීමකි. වටපිට ඇවිදින ගමන් ගාල්ලේ මව සරුවට වැවී තිබුණ පොල්පලා ගස් රැසක් ගලවා ගත්තාය. “මුත්‍ර අමාරුවලට පොල්පලා හරිම ගුණයි” ඇය දරුවන්ට කීවාය.

තණමල්විල ගමන සතුටින් නිම කළ පිරිස ආපසු ගාල්ලේ නිවසට පැමිණියහ. මව පසුදින තණමල්විල සිට ගෙනෙන ලද පොල්පලා තම්බා බීවේ මුත්‍ර පිරිසිදුවන බව පවසමිනි. එහෙත් මුත්‍ර පිරිසිදු වීම කෙසේ වෙතත් එය පානය කර ටික වේලාවක් යනවිට ඇයගේ හැසිරීම් රටාවේ වෙනසක් දැකගත හැකි විය.

ඇය වරෙක නොනවත්වා සිනාසෙන්නට වූ අතර තවත් වරෙක නිහඬව බලා සිටින්නට වූවාය. ඇස් රතු වී තිබිණ. දියණිය බියට පත්ව මේ බව පියාට කීවාය. අම්මා තණමල්විලින් ගෙනා පොල්පලා බිවූ පසු අමුතු වී ඇති බව දියණිය පියාට කීවාය.

පියා ඉක්මනින් පැමිණ කුස්සියට ගොස් පොල්පලා තැම්බු හැලිය බැලු‍වේය. ඉතිරිව තිබූ අමු පොල්පලා මිටියද පරීක්ෂා කළේය. සිදුව ඇති දෙය ඔහුට පැහැදිලි විය. ඔහු පොල්පලා සමග තිබූ ගස් කිහිපයක් ගෙන දියණියට පෙන්වා “මේවා අර තණමල්විල වැවෙන තහනම් ගස්” පියා එම ගස් කුමක්ද කියා දියණියට කියා දුන්නේය. පොල්පලා ගස් සමග එම තහනම් ගස් ද තිබී ඇති බව ඔවුනට තේරුණේ පසුවය. මේ අතර මව ද තද නින්දකට වැටී සිටියාය.