(දේවහුව ප්‍රසාද් ජයකොඩි)

කොන්දේ අමාරුවට බෝඹු පොතු වෙනුවට අලිගැට පේර පොතු බැන්ද මවක පිළිබඳව බම්බාව ප්‍රදේශයෙන් වාර්තාවේ.

දරුවන් තිදෙනෙකුගේ මවක වන ඇය කොන්දේ අමාරුවක් සෑදී බටහිර වෙදකම් කළත් සුව නොවූ නිසා කැඩුම් බිඳුම් වෙදමහතෙකු හමුවී ප්‍රතිකාර ගැනීමට ගොස් එහිදී වෙදමහතා පත්තුවක් බැඳ බෙහෙත් තෙල් සමඟ බෙහෙත් වට්ටෝරුවක් අතට දී කියා තිබෙන්නේ මෙම බෙහෙත් කොටා තුන් වතාවක් පමණ බඳින විට සුව වන බවත් නැවත ඒමට අවශ්‍ය නොවන බවත්ය. පසුදා උදේ කොන්දේ අමාරුව සුව අතට හැරී තිබෙන බව පෙදරේරු රැකියාවේ යෙදෙන තම සැමියාට පවසා මෙම වට්ටෝරුවේ තිබෙන බෙහෙත් සොයා දෙන ලෙස පවසා ඇත. ඔහු බෙහෙත් වර්ග කිහිපයක් සොයා දී රැකියාවට යෑමට පරක්කු වන බව පවසා අක්කාගේ ගෙදර පිටුපස බෝඹු ගසක් තිබෙන බවත් කවුරුන් හෝ යවා බෝඹු පොතු ටිකක් ගෙන්වා ගන්නා ලෙස පවසා ඇත.

ඇයට ආ කේන්තියට කොන්දට අතක් තබාගෙන පිහියක් ද රැගෙන මගේ ලෙඬේට මම ම බෙහෙත් සොයා ගන්නම් කියා අක්කාගේ නිවස අසල තිබූ අලිගැට පේර ගසෙන් පොතු ගලවාගෙන බෙහෙත් වට්ටෝරුවේ ලියා ඇති පරිදි බෙහෙත් කොටා පත්තුව බැඳ ඇත. එම බෙහෙත්වලට සුව නොවූ නිසා නැවත වෙදමහතා හමු වී වෙදමහතා පැවසූ ආකාරයට බෙහෙත් බැන්ද නමුත් කොන්දේ අමාරුව සුව නොවූ බව පවසා ඇත. වෙදමහතා පුදුමයට පත් වී එම බෙහෙත්වල ඉතිරි බෙහෙත් රැගෙන එන ලෙස දන්වා ඇත.

වෙදමහතා එකින් එක බෙහෙත් පරික්ෂා කර බලා මෙය බෝඹු පොතු නොවන බව පවසා ඇත. ඇය වෙද මහතා සමඟ තර්ක කර අක්කාගේ වත්තේ බෝඹු ගසෙන් මෙම පොතු ගලවාගත් බව පැවසීය. වෙදමහතා ගෝලයෙකු යවා එම ගස පරික්ෂා කර බලා බෝඹු ගස ළඟ අලිගැට පේර ගසක් ඇති බවත් අලිගැට පේර ගසේ පොතු ගලවා ඇති බවත් පැවසීය. මේ පිළිබඳව දැනගත් වෙදමහතා මහ හයියෙන් සිනා වී මම පාරම්පරික වෙදමහතෙක් මට බොරු කරන්න බෑ යනුවෙන් පවසා ඇත. ලැජ්ජාවට පත් කාන්තාව මට බෙහෙත් එපා යැයි පවසා ගෙදර ගොස් ඇත.