(කතරගම - කේ.ඩී. දේවප්‍රිය)
පවතින වාතාවරණය හමුවේ නිවෙසක ගේට්ටුවක එල්ලන ලද බෑගයක් මුල්කර ගෙන ආරක්ෂක අංශ වෙත යෑමට තිබූ අපූරු පුවතක් වඳුරකු නිසා වැළකී ගිය කථාවක් කතරගම ප්‍රදේශයෙන් වාර්තා විය. 


කතරගම පෙරගිරිගම නිවෙසකි. මෙම නිවෙසේ සිටි පිරිස අඟහරුවාදා දින කතරගම සති පොළ වෙත ගියේ නිවෙසේ දියණියක් හා අසල්වැසි තවත් තරුණියක් සිටියදීය. 


සවස 3 ට පමණ අදාළ නිවෙසේ ගේට්ටුවේ තරමක විශාල කළු ඉටි බෑගයක් එල්ලා තිබෙන අයුරු නිවෙසේ සිටි පිරිස දකින ලදී.


රටේ තැනින් තැන ඇති අභිරහස් පාර්සල් ගැන නිතර දැනුම්දෙන පුවත් පිළිබඳව නිරායාසයෙන් අවදියෙන් සිටිය යුතු නිසා දැනුම්වත්ව නිවෙසේ සිටි තරුණිය වහා සති පොළට ගිය අම්මාට මෙම පුවත ඇගේ ජංගම දුරකතනයෙන් කතා කර පවසා ඇත. 


මෙම සිදුවීම ඇසූ ඇය වහා තවත් පිරිසක් සමඟ නිවෙසට පැමිණියත් අදාළ බෑගය එල්ලා ඇති ගේට්ටුව ඇරීමට නොහැකි නිසා මෙම බෑගය සම්බන්ධ ආරක්ෂක අංශ දැනුම්වත් කළ යුතු බව එතැනට එක් රොක්වී සිටි පිරිස පැවැසූහ. 


හදිසියේ මෙම ස්ථානයට පැමිණි වඳුරකු අදාළ බෑගය කඩාගෙන ගොස් ගසක් උඩට ගැනීමේදී බෑගයේ තිබූ කොස් මදුළු එකින් එක වැටීමට පටන්ගෙන ඇත.


පසුව මෙම බෑගය පිළිබඳ කරුණු අනාවරණය විය. අසල්වැසි කාන්තාවක් විසින් තම නිවෙසේ කොස් ගසකින් කඩාගත් කොස් ටිකක් බෑගයක දමා අදාළ නිවෙසට රැගෙන පැමිණියත් නිවෙස වසා තැබීම නිසා මෙම කොස් බෑගය ගේට්ටුවේ එල්ලා ගිය බව දැන ගන්නට ලැබුණි. 


වඳුරා විසින් කොස් මල්ල රැගෙන නොයන්නට මෙම ස්ථානයට ආරක්ෂක අංශ ද පැමිණ නිකරුණේ කාලය කා දැමීමට ද තිබුණි.