තවත් බක් මහ උළෙලකි. ජන ක‍්‍රීඩා අතරට අමුතු අමුතු අලූත් ක‍්‍රීඩා ද එක්කොට තිබිණි. බැලූම් පුම්බා බැලූම් නළල මත තබා නටන තරග ද දිගම හූව තැබිය හැකි තරගකරු තේරීම ද ඒ අතර විය. ඒ අතර සුපුරුදු පරිදි අලියාට ඇස තැබීම, කනා මුට්ටි බිඳීම ද තරග ඉසව් අතර සූදානම්ව තිබිණි. සුළු සුළු තරග ඉවර විය. ලිස්සන ගසට තවමත් ජයග‍්‍රහයකු නැත. ඒ අතර කනාමුට්ටිය බිඳින තැන උණුසුම් විය. තරග කරුවන් මුට්ටි දෙකක් බිඳ තිබුණ ද ජයග‍්‍රාහි මුට්ටිය තවමත් ලණුවේය. අවට සිටි සියල්ලෝම කනා වටා රොක් වූහ. පිරිසගේ දිරිගැන්වීමේ ඝෝෂාව මැද කනා මුට්ටිය අසලට සමීප විය. වෙර ගත්තේය. වේගයෙන් පහරක් එල්ල කළේය. මුට්ටිය බිඳෙන හඬින් ක‍්‍රීඩා පිටිය දෝංකාර දෙද්දී යටි ගිරියෙන් කෑ ගසමින් තරුණියක් දඟලන්න වූවාය. කුමක් සිදු විනිදැයි බලා සිටි අය පුදුම විය. කනා විසින් බිඳිය යුතු ජයග‍්‍රාහී මුට්ටිය පාන්පිටි පිරවූ මුට්ටියකි. එය බිඳී ගොස් තිබුණි. ඒත් සමගම කුමක්දෝ විසිවී යනු ද බොහෝ දෙනා දැක තිබුණි. කිසිවකු විසින් පිටි මුට්ටිය තුළට ගෙම්බකුද දමා තිබිණි. ගෙම්බා මුට්ටියෙන් නිදහස්ව ගොස් ඊළඟට වැටී තිබුණේ යටිගිරියෙන් කෑ ගැසූ තරුණියගේ ළැම අතරටය. තරග අතරට නොහොබිනා දේ සිදු කළ කෙනා කවුදැයි බොහෝ දෙනා දොස් කියද්දී තරුණියගේ ළයට පතිතවූ ගෙම්බා ඉවත් කිරීමට සංවිධායක මණ්ඩලයේම තරුණියෝ කිහිප දෙනෙක් එක්ව සිටියහ.