එෆ්.අස්ලම්
 
කොටි නායක වේළුපිල්ලේ ප්‍රභාකරන්ගේ කාලයේ දෙමළ ජනතාව ආරක්ෂාකාරීව ජීවත් වූ බවත් ලෝකයාම දන්නා ඒ සත්‍ය කතා කළ සැණින් විජයකලා මහේෂ්වරන් ත්‍රස්තවාදියකු නොවන බව උතුරු පළාත් ප්‍රධාන අමාත්‍ය සී.වී.විග්නේෂ්වරන් මහතා සඳහන් කරයි.


මේ සත්‍ය කතා කළ හෙයින් විජයකලා මහේෂ්වරන් අමාත්‍ය ධූරයෙන් ඉවත් කිරීම අසාධාරණ බවත් ඇයට ජනතා සේවය කිරීම සඳහා පක්ෂය විසින් ඉඩ සැළසිය යුතු බවත් මහ ඇමැතිවරයා අවධාරණය කළේය.


සතියකට එක් ප්‍රශ්නයක් නමින් මාධ්‍ය විසින් විජයකලා මහේෂ්වරන් මහත්මිය විසින් කරන ලද ප්‍රකාශය ගැන අසන ලද පැනයට පිළිතුරු දෙමින් විග්නේෂ්වරන් මහතා මේ බව කීය.


උතුරේ වත්මන් ආරක්ෂාකාරී තත්වයත් පෙර පැවති ආරක්ෂාකාරී තත්වයත් ගැන විවේචනය කරන්න කාටත් අයිතියක් තියෙනවා. අද පවතින ආරක්ෂාකාරී වාතාවරණය වෙනස් විය යුතුයි කියල ඇය කරන ලද කතාවේ කිසිදු වරදක් නැහැ.

පෙර පැවති කාලයේ අපගේ ජනතාව ආරක්ෂාකාරීව ජීවත් වුණ එක සත්‍යක්.
යුද්ධය කාලයේ කාන්තාවක් රන් ආභරණ පැළඳගෙන‍ කිසිදු කරදරයක් හෝ නොමැතිව ගමන් ගිහිං නිවසටත් එනවා.ඒ වකවානුවේ එහෙම තත්වයක් තිබුණා.මෙය ලෝකයා දන්නා සත්‍යක්.
 
ඒත් අද එහෙමද කැපුම් කෙටුම්, අපයෝජන, ප්‍රචන්ඩත්වය, මත්ද්‍රව්‍ය ජාවාරම් හා භාවිතය, වැඩිවෙලා තියෙනවා. දූෂණ වංචා ද එමටම සිදුවෙනවා. ඒනිසා තමයි මම කියන්නේ හමුදාව ඉවත් කරන්න.

පොලිස් බලතල අපට දෙන්න කියලා. එසේ වන්නේ නම් මේ සියළු අපරාධ ප්‍රචණ්ඩ ක්‍රියා නවතා පෙන්වන්නම්. මේ තත්වය ගැන අවබෝධයක් නොමැති දකුණේ පිරිස් තම හදවතේ ඇති විරෝධය මතුකර සිටිනවා.

මොවුනගේ මේ විරෝධය විජයකලාට එරෙහිව නෙවෙයි. දෙමළ ජාතිය ගැන සැකය, අවිශ්වාසය, බය නිසයි.


අපගේ අදහස් ගැන විවේචන නොකර අපගේ ප්‍රශ්න ගැන සාකච්ඡා කරන්න ඉදිරිපත් වෙන්න. ෆෙඩරල් විසඳුමක් ඇති කරන්න මුල් වෙන්න කියල අපි දකුණේ දේශපාලන නායකයින්ට ඇරයුම්  කරනවා.