(නිමල කොඩිතුවක්කු)

එක්සත් ජාතික පක්ෂය ප‍්‍රමුඛ එක්සත් ජාතික පෙරමුණේ පක්ෂ නායකයින්ගේ විශේෂ හමුවක් ඉදිරි දින දෙක තුළ පැවැත්වීමට නියමිතය.

එක්සත් ජාතික පෙරමුණේ නායක අග‍්‍රාමාත්‍ය රනිල් වික‍්‍රමසිංහ මහතාගේ  ප‍්‍රධානත්වයෙන් පැවැත්වෙන  මෙම සාකච්ඡාව සඳහා අග‍්‍රාමාත්‍යවරයාගේ ආරාධනයට  අනුව එක්සත් ජාතික පක්ෂයේ නියෝජ්‍ය නායක  නිවාස ඉදිකිරීම් සහ සංස්කෘතික කටයුතු අමාත්‍ය සජිත් පේ‍්‍රමදාස මහතා සහභාගීවීම විශේෂත්වයකි.

කොළඹ අරලියගහ මණ්දිරයේදී  මෙම සාකච්ඡාව පැවැත්වීමට නියමිතව පවතී.

එක්සත් ජාතික පක්ෂය මූලිකත්වයෙන්  ප‍්‍රජාතන්ත‍්‍රවාදී ජාතික පෙරමුණ  පිහිටුවීමට අදාළ ව්‍යවස්ථා කෙටුම්පත මේ වනවිට සකස්  කර අවසන්ව ඇති අතර ඊට එක්සත් ජාතික පෙරමුණේ පක්ෂ නායකයින්ගේ පූර්ණ  එකඟතාවයද පළ වී ඇතැයි ප‍්‍රජාතන්ත‍්‍රවාදි ජනතා පෙරමුණේ නායක ජාතික ඒකාබද්ධතා, රාජ්‍ය භාෂා, සමාජ ප‍්‍ර‍්‍රගති සහ හින්දු ආගමික කටයුතු අමාත්‍ය මනෝ ගනේෂන් මහතා පැවසීය.

එක්සත් ජාතික පක්ෂය මූලිකත්වයෙන්  බිහිවන පුළුල් සන්ධානයේ ප‍්‍රතිපත්ති ප‍්‍රකාශය සැකසීමට සකස් කළ සෞඛ්‍ය පෝෂණ හා දේශීය වෛද්‍ය අමාත්‍ය  දොස්තර රාජිත සේනාරත්න කමිටු වාර්තා ද ඉදිරියේදී පැවැත්වෙන එක්සත් ජාතික පෙරමුණේ පක්ෂ නායකයින්ගේ හමුවට ඉදිරිපත් කෙරේ.

ශ්‍රී ලංකාවේ ග‍්‍රාමීය  ආර්ථිකය නගා සිටුවීම සඳහා එක්තත් ජාතික පක්ෂයේ නියෝජ්‍ය නායක  නිවාස ඉදිකිරීම් සහ සංස්කෘතික කටයුතු අමාත්‍ය සජිත් පේ‍්‍රමදාස මහතා විසින් ඉදිරිපත් කරන යෝජනා කිහිපයක් පිළිබඳව ද  ඉහත පක්ෂ නායකයින්ගේ හමුවේදී  අවධානය යොමුකිරීමට නියමිතය.