(තලාතුඔය ටී.එච්. සරත්)
ඉතාලියේ සිට පැමිණි පිරිසක් තලාතුඔය අංකෙළිපිටිය ප්‍රදේශයේ නිවෙසක සැඟව සිටින්නේ යයි පවසමින් මුහුණු පොතේ පළකොට පොලිසියට හා මහජන සෞඛ්‍ය පරීක්ෂකවරුන්ට ව්‍යාජ දුරකතන ඇමතුම් ලබාදීම නිසා පෙරේදා (24) තලාතුඔය අංකෙළිපිටිය ප්‍රදේශයේ ගම්වාසීහු මහත් අසීරුතාවට පත්වූහ.
දැනට ඉතාලියේ මිලානෝ නුවර වෙසෙන සහෝදරියන් දෙදෙනකු මෙසේ පැමිණ ඇතැයි ද ඔවුන් තමන්ගේ නිවෙස්වල සැඟව සිටිතැයිද දුරකථන ඇමැතුම් මගින් සෞඛ්‍ය වෛද්‍ය නිලධාරී කාර්යාලය හා පොලීසිය වෙත ඇමතුම් ලබාදී තිබේ.
අංකෙළිපිටිය ප්‍රදේශයේ එකම පවුලේ අක්කා සහ නංගී ඉතාලියේ වෙසෙන අතර එක් අයකුගේ ස්වාමිපුරුෂයා සහ දරුවා ද එහි වෙසෙති. මේ පිළිබඳව තලාතුඔය මහජන සෞඛ්‍යය පරීක්ෂකවරුන් එම කාන්තාවන්ගේ නිවෙස සොයාගොස් පරීක්ෂාවට ලක්කර ඇති අතර එහිදී එම කාන්තාවකගේ ලංකාවේ වෙසෙන සැමියා දුරකතනයෙන් ඉතාලියේ වෙසෙන බිරිඳ හා ඇගේ සොහොයුරිය අමතා මහජන සෞඛ්‍යය පරීක්ෂකවරයා අමතන ලෙසට කියා තිබේ.
ඒ අනුව මිලානෝ නගරයේ සිට තමන් තවමත් එහි සිටින බව ඔප්පු කිරීමට ඔවුන් දෙදෙනා පවතින දැඩි අවදානමද නොතකා වීඩියෝ තාක්ෂණය ඔස්සේ මහජන සෞඛ්‍යය පරීක්ෂකවරයා අමතා ඇත්තේ ඉතාලියේ මිලානෝ නගරයේ වීදි, මාවත් හා වටපිටාව පෙනෙන ආකාරයටය. මේ පිළිබඳව එම කාන්තවකගේ ස්වාමිපුරුෂයා කියා සිටියේ මෙවන් අනතුරුදායක මොහොතක මෙවැනි බොරු ප්‍රචාර ලබාදෙමින් ජනතාව බිය වැද්දීම හා තමන් සිටින අසීරුතාව නොසලකා ක්‍රියා නොකරන ලෙස තමන් සැමගෙන් ඉල්ලා සිටින බවයි.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
