මනාලියක හැඩගැන්වීම සඳහා ආභරණ වෙනුවට එළවළු මල්ලක් රැගෙන ගිය රූපලාවන්‍ය ශිල්පිනියක පිළිබඳව නගරබද ප්‍රදේශයකින් අසන්නට ලැබිණි.

සිද්ධිය මෙසේය. පසුදින නැකත් දිනයක් වූ බැවින් එදින මංගල උත්සව කිහිපයක්ම එම 
රූපලාවන්‍යාගාරයට ලැබී තිබුණි. එහෙයින් එදින අමතරව තාවකාලික රූපලාවන්‍ය ශිල්පිනියකගේ සේවය ලබා ගැනීමට ආයතනය හිමි රූපලාවන්‍ය ශිල්පිනිය කටයුතු කළාය.

කෙසේ වෙතත් නියමිත දිනයේ රූපලාවන්‍යාගාරයකට පැමිණි අමතර රූපලාවන්‍ය ශිල්පිනිය මනාලියට නියමිත ඇඳුම් ගෙන ආභරණ කොහෝ දැයි විමසා ඇත. ආභරණ පාර්සලය සකස් කර කළු බෑගයක දමා ඉදිරියේ තබා ඇති බව ආයතනය හිමි රූපලාවන්‍ය ශිල්පිනිය පැවැසුවේ ඇය ඒ වනවිටත් වෙනත් වැඩක යෙදී සිටි බැවිනි. මගුල් ගෙදර තරමක් දුර බැහැර බැවින් ශිල්පිනිය ආයතනය ඉදිරිපස තබා තිබුණු පාර්සලය රැගෙන ඉක්මණින් පිටත්ව ගියාය. නිසි පරිදි මනාලිය අන්දවා ආභරණ පාර්සලය ලියා බලද්දී එතුළින් මතුවූ එළවළු දැක ඇය අන්දුන් කුන්දුන් වූවාය. නැකත් වෙලාව ආසන්න බැවින් ඇය හනික මගුල් ගෙදරට ආ ත්‍රිරෝද රථයකින් ගොස් ආභරණ රැගෙන විත් නැකතට විනාඩියකට කලින් තම කාර්යය නිම කර යාන්තමින් ජාං බේරා ගත්තාය.

ඇය රූපලාවන්‍ය ආයතනයෙන් රැගෙන ගොස් ඇත්තේ ඇහිබැම සකස් කිරීමට පැමිණි කාන්තාවකගේ එළවළු මල්ල බව පසුව දැනගන්නට ලැබුණි.
(කලවාන උපේන්ද්‍ර ප්‍රියංකර ජාතුංගම)