මනාලිය ගෙදර ආ දවසේ අමුතු කෙල්ලක් ඇවිත් ජංජාලයක්

(මොරගොල්ලාගම - සිසිර කැලේගම)

මනමාලිය මනාලයාගේ නිවසට කැඳවාගෙන පැමිණ මංගල උත්සවය සමරන අතරවාරයේ පරණ පෙම්වතිය අඬමින් මනාලයාගේ නිවසට පැමිධෑමෙන් දෙපාර්ශවයේ නෑදෑ පිරිස අසරණභාවයට පත්වීමේ පුවතක් වයඹ හා රජරට සීමා අතර ගම්මානයකින් අසන්නට ලැබුණි.

සිද්ධිය මෙසේය. එදින මංගල දිනයකි. මනාලිය කැඳවාගෙන ඒමට මංගල පාර්ශවයේ ඥාතීහු පිටත් වූහ. නැකැත්වලට අනුව චාරිත්‍ර සිදුකර මනාලිය කැඳවාගෙන මනාලයාගේ නිවසට පැමිණියේය. දෙපාර්ශවයේ ඥාතීන් මනාලයාගේ නිවසේ සතුටු සාමීචියේ යෙදී සිටින අතරවාරයේ නාඳුනන කාන්තාවක එම නිවසට ඇතුළු වී තිබේ. මනාල යුවළ සිටි පුටුව අසලට ගිය කාන්තාව මනාලයාගේ අත අල්ලා ‘මං බඳිනවා කියා බොරු පොරොන්දු දීලා අතරමං කෙරුවේ’ ඇයි කියමින් විලාප දෙන්නට වූවාය. රැස්ව සිටි පිරිස අන්දුන් කුන්දුන් වී ඒ දෙස බලා සිටියහ. මනාලයා ද කිසිත් නොදොඩා නිසොල්මන්ව සිටියේය. ඒ අතරවාරයේ එහි පැමිණි පිරිසක් විලාප දෙමින් සිටින කත එළියට රැගෙන ගියේය. ඇය මනාලයාගේ යහළුවකු බවත් ඔහු කාන්තාවක් ලෙස වෙස් වලාගෙන පැමිණි බවත් රැස්ව සිටි පිරිසට හඳුනා ගැනීමට හැකිවීමෙන් පසුව මනාලිය හා එම පවුලේ පිරිස් සිනා මුසු මුහුණින් යුතුව සුසුම් හෙලූහ.