අගනුවරින් මිනුවන්ගොඩ හරහා දිවුලපිටිය බලා දිවයන රාත්‍රි බස්රථයක ගමන් ගත් බීමත් පුද්ගලයකුට සිදුවූ අපුරු සිදුවීමකි මේ.

 හොඳින් හැඳ පැළඳගත් තරුණ වියේ අයෙක් ගමන් මල්ලක් රැගෙන පිටකොටුව බස්පොළෙන් දිවුලපිටිය බලා දිවනෙ බස්රථයකට ඉකුත් සිකුරාදා රාත්‍රියේ නැග ගත්තේය.

 බසය තුළ ඒ මේ අතට  හැරෙමින් මගීනට  හිරිහැරයක්වූ ඔහු කොන්දොස්තරවරයා සමගද බහින්බස් වුයේය.   

ඔහු  විටෙක ඒ අතටත් විටෙක අනෙක් අතටත් ඇඹරෙමින්ද අසුන්වල  එල්ලෙමින්ද ගමන් කිරීම මගීන්ට මහත් හිරිහැරයක් විය.

මේ තත්ත්වය නිසා ඔහු අතර මගින් බස්සවන්නැයි මගීහු කෑ ගැසූහ.

එවිට බසය පාරේ  අයිනකට කර නැවැත්වූ  රියැදුරු “බසයේ මගීන්ට අවහිරයක් නොවන ලෙස යාමට නොහැකි නම් බසයෙන් එළියට ඇද දමනවා හැර වෙනත් කළ හැකි කිසිවක් නැතැ”යි  තදින් පැවසීය.

බීමත් මගියා නිසොල්මන්ව සිටියේය. එවිට බසය යළි ගමන ආරම්භ කළේය. 

බසය කලබලයකින් තොරව ඉදිරියට යද්දි එක්වර මහා ගෝසාවක් ඇති විය.

 “බසය ඇතුළේ වතුර හලලා පෑගෙයි... පෑගෙයි.” වැඩිදෙනා කෑ ගසන්නට වූහ

බසය  ඇතුළේ වතුර  ගලන්නට විය. විපරම් කර බලද්දී  බීමත් පුද්ගලයාට කරදරයක්වී ඇති බව කාටත් වැටහුණි.

 බසය නතර විණි. එහි සිටි තරුණයෝ කිහිප දෙනෙක් බීමත් අය නැගිටුවා බෑගයද අතට දී අයුරු බස් නැවතුමක් අසල බැස්ස වූහ. 

බීමත්  පුද්ගලයා “ආ....මේ. .. මේ අපේ ගේ ළඟ නේද.... හොඳයි මල්ලිලා බොහොම ස්තුතියි.....” කියා බස් නැවතුම් පොළේ අසුනකට බර වුයේය.

ඉන්පසු දිවුලපිටිය බස්රථය යළි ගමන් ආරම්භ කළේය.
(දූනගහ බටේපොල විජයසිරි)