(කටුගස්තොට ධම්මික ගුණවර්ධන)
යුවතියකගේ අත් බෑගයේ සැඟවී ආ පෙරේතයකු හදිසියේ කොළඹ-නුවර මාර්ගයේ කඩවත ප්‍රදේශයේදී කළඑළි බැසීමෙන් බස් රථය එකම තොවිලයක් බවට පත්වූ පුවතක් වාර්තා වේ.
වාර්තාවන අන්දමට සිද්ධිය මෙසේය.
බටහිර පන්නයට හැඩ වැඩ වී සිටි ඇය තම පෙම්වතා යැයි සිතිය හැකි තරුණයකු සමඟ කොළඹ බලා දිවෙන නගරාන්තර ශීඝ්‍රගාමි බස් රථයකට ගොඩවී ඇත්තේ පේරාදෙණිය ප්‍රදේශයේදීය.
බස්රථයේදී ඔවුන්ගේ ලෝකයේ තනිවූ ඔවුන් සෙසු මගීන් ගැන තුට්ටුවකට මායිම් නොකර උකුළු-මුකුළු පාමින් ගියද ඇයගේ පෙම්වතා යැයි සිතිය හැකි තරුණයා ඇයගෙන් සමුගෙන බැසගොස් ඇත්තේ යක්කල ප්‍රදේශයේදීය.
ඉන් අනතුරුව හුදකලාව නිදිමත ස්වරූපයෙන් ගමන්ගත් ඇය කඩවත ප්‍රදේශය පසුවනවාත් සමගම එක්වරම පෙරේතයෙක් පෙරේතයෙක් යැයි මහ හඬ නඟමින් තම අත්බෑගයද ගසා දමා බස්රථයේ ආසන මත නැගී දඟලන්නට වූවාය.
හිටිහැටියේම වූ මෙම කලබැගෑනිය කුමක්දැයි නොදත් රියදුරුද ලහි ලහියෝ බස්රථය අයිනක නවතා සෙසු මගීන්ද සමගින් විපරම් කිරීමේදී දැක ඇත්තේ ඇගේ අත් බෑගයේ එතෙක් සිරව සිටි හූනෙකු පණ බේරාගෙන බස් රථයේ දිවයන අයුරුයි.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
