සංචාරක කර්මාන්තයේ ව්‍යවසායකයන්ට අත හිත
(බිඟුන් මේනක ගමගේ )
පාස්කු ඉරිදා ත්‍රස්ත ප්‍රහාරයෙන් පසුව සංචාරක කර්මාන්තයේ බිඳවැටීමෙන් ආර්ථික වශයෙන් දුෂ්කරතාවයට පත්ව සිටින මහා පරිමාණ හා මධ්‍ය පරිමාණ ව්‍යවසායකයන්ට පහසුකම් සැලැසීමට විශේෂ වැඩපිළිවෙලක් ක්‍රියාත්මක කරන්නේ යැයි කාර්මික අපනයන ආයෝජන ප්‍රවර්ධන හා සංචාරක සහ ගුවන් සේවා ඇමැති ප්‍රසන්න රණතුංග මහතා ‘ලංකාදීප’ යට අද (24) පැවැසීය.
හෝම් ස්ටේ සංකල්පය යටතේ කොළඹින් පිට පළාත්වල විශාල පිරිසක් සංචාරක කර්මාන්තයට සම්බන්ධ වී යැයි ද ජාතික ආරක්ෂාව සම්බන්ධයෙන් මතු වූ අර්බුදකාරී පරිසරයෙහි ඔවුන්ගේ ආර්ථිකය බිඳවැටුණේ යැයි ද අමාත්‍ය රණතුංග මහතා අවධාරණය කළේය.
ඒ අනුව මෙම පිරිස්වලට සිය ව්‍යාපාර යළි ආරම්භ කිරීමට මුදල් අමාත්‍යංශය සමග සාකච්ඡා කර මෙම වැඩපිළිවෙල ක්‍රියාත්මක කරන්නේ යැයි ද රණතුංග මහතා පැවැසීය.
2009 යුද්ධය නිමාවීමෙන් පසුව සංචාරක කර්මාන්තය සීඝ්‍ර වර්ධනයක් අත්පත් කරගත් නමුත් 2015න් පසුව හටගත් දේශපාලන අස්ථාවරභාවය නිසා එය ආපස්සට හැරවුණේ යැයි ඔහු චෝදනා කළේය.
ගෝඨාභය රාජපක්ෂ මහතා ජනාධිපති ධුරයට පත්වීම සමග දැන් නැවතත් කොටස් වෙළෙඳපොළ වේගයෙන් ඉහළ යමින් ව්‍යාපාරිකයන් අතර ලොකු විශ්වාසයක් ගොඩනැගී ඇතැයි ද මෙතෙක් කල් මෙරටට නොපැමිණි ආයෝජකයන් කැඳවාගැනීම සඳහා අවශ්‍ය පරිසරය සකස් කිරීමට තමා කටයුතු කරන්නේ යැයි ද අමාත්‍ය රණතුංග මහතා පැවැසීය.
ජාතික ආරක්ෂාව ස්ථාවර වෙද්දී විදේශිකයන් පැමිණීම අනිවාර්යෙන්ම ඉහළ යනු ඇතැයි ද අමාත්‍ය රණතුංග මහතා වැඩිදුරටත් සඳහන් කළේය.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
