විදුරුමස් රෝග වර්තමානයේ බහුලව දක්නට ලැබුණ ද, එය ඉතා පහසුවෙන් වළක්වා ගත හැකි තත්ත්වයකි. දෛනිකව නිවැරදි සෞඛ්‍යය පුරුදු පවත්වා ගැනීමෙන් සහ නිසි කලට වෘත්තීය වෛද්‍ය සහාය ලබා ගැනීමෙන් මුල් අවධියේ පවතින විදුරුමස් ගැටලු සම්පූර්ණයෙන්ම සුව කළ හැකිය. එබැවින් ආරම්භයේ සිටම නිවැරදි පියවර ගැනීම අත්‍යවශ්‍ය වේ.

විදුරුමස් රැක ගැනීම සඳහා දිනකට දෙවරක් අවම වශයෙන් විනාඩි දෙකක්වත් දත් මැදීම අත්‍යවශ්‍යය. විශේෂයෙන්ම රාත්‍රී නින්දට පෙර දත් මැදීම සහ මාස තුනකට වරක් දත් බුරුසුව අලුත් කිරීම වැදගත් වේ. විදුරුමස දිගේ දත් බුරුසුව මෘදු ලෙස රවුමට හැසිරවීමෙන් විදුරුමස්වලට හානි නොකර දත්වල මැලියම් (Plaque) ඉවත් කළ හැකිය.

කුඩා දරුවන්ට මෘදු ලෙස දත් මැදීමේ පුරුද්ද මුල සිටම හුරු කළ යුතුය. හෝමෝන වෙනස්කම් සිදුවන තරුණ වියේ දී, දත් අතර පිරිසිදු කිරීමට 'Flossing' ක්‍රමය හෝ ඒ සඳහාම වෙන්වූ කුඩා බුරුසු (Interdental brushes) භාවිත කිරීම අත්‍යවශ්‍ය වේ. වයස අවුරුදු 35 ඉක්මවූවන් රෝග ලක්ෂණ පිළිබඳව වැඩි අවධානයක් යොමු කළ යුතු අතර වැඩිහිටියන් වියළීම පාලනය කිරීමට වැඩිපුර ජලය සහ මුඛ සේදීමේ දියර (Mouthwash) භාවිත කළ යුතුය.

විටමින් C බහුල පළතුරු, කැල්සියම් සහිත ආහාර සහ ග්‍රීන් ටී (Green tea) විදුරුමස් නිරෝගීව තබයි. සීනි සහිත ආහාර සීමා කිරීම සහ දුම්කොළ භාවිතයෙන් වැළකීම ද ඉතා වැදගත්ය.

විදුරුමස්වල ලේ ගැලීමක්, ඉදිමීමක් හෝ මුඛයෙන් දිගින් දිගටම දුගඳ හැමීමක් දැනේ නම්, වහාම වෛද්‍ය උපදෙස් ලබා ගන්න. විදුරුමස් රෝග මුල් අවධියේ දී සම්පූර්ණයෙන්ම සුව කළ හැකිය. අපි ආරම්භයේ සිටම නිවැරදි දේ කළහොත්, ජීවිත කාලය පුරාම නිරෝගී විදුරුමසකට උරුමකම් කිව හැකිය.