හමුදා නිල ඇඳුමින් සැරසුණු සටන්කාමීන් පිරිසක් ඊයේ (16) අලූයම පාකිස්තානයේ මින්හාස් ගුවන් හමුදා කඳවුරට කඩා වැදී එල්ල කළ ප‍්‍රහාරයකින් පාකිස්තාන සෙබළු 10 දෙනෙක් ජීවිතක්ෂයට පත් වූහ. 15 දෙනක් තුවාල ලැබූහ. පාකිස්තාන ගුවන් හමුදාවට අයත් මිග් සහ ජේ එෆ් 17 වර්ගයේ ප‍්‍රහාරක යානා රඳවා ඇත්තේත්, ඒවායේ අලූත් වැඩියා කටයුතු සිදු කරන්නේත් මින්හාස් ගුවන් හමුදා කඳවුරේය. සටන්කාමීන් එල්ල කළ ප‍්‍රහාරයෙන් මිග් යානා දෙකකටත් හානි සිදුවී ඇතැයි වාර්තා වේ. සටන්කාමීන් කඳවුරට ඇතුළු වී ඇත්තේ අලූයම 2 ට පමණය. හමුදා නිල ඇඳුමින් පැමිණි නිසා ඔවුන්ට පහසුවෙන් කඳවුරට යෑමට හැකි වී ඇතැයි ආරක්ෂක අංශ පවසයි. සටන්කාමීන් බෝම්බ කබාවලින් සැරසී, ආර්.පී.ජී. සහ ස්වංකී‍්‍රය ගිනි අවි අතැතිව පැමිණ ප‍්‍රහාරය එල්ල කළ බව ආරක්ෂක අංශ වැඩිදුරටත් කියා සිටී. ප‍්‍රහාරය එල්ල වෙද්දී පාකිස්තාන හමුදා වහා කි‍්‍රයාත්මක වී ඇත. ප‍්‍රහාරය සඳහා සටන්කාමීන් 8 දෙනකුගෙන් යුත් කණ්ඩායමක් පැමිණි ඇතැයි ආරක්ෂක අංශ පවසයි. පාකිස්තාන හමුදා එල්ල කළ ප‍්‍රහාරයෙන් සටන්කාමීහු අටදෙනාම ජීවිතක්ෂයට පත් වූහ. ප‍්‍රහාරයේ වගකීම තවමත් කිසිවකු විසින් බාර ගෙන නැත. පාකිස්තාන රජය පවසන්නේ එය, තලේබාන් හෝ අල් කයිඩා හෝ සටන්කාමීන් එල්ල කළ ප‍්‍රහාරයක් විය හැකි බවය. ප‍්‍රහාරය එල්ල වූයේ පාකිස්තාන/ඇෆ්ගන් ගෝත‍්‍රික ප‍්‍රදේශවල සැඟවී සිටින සටන්කාමීන් සොයමින් පාකිස්තාන හමුදා පෙරේදා (15) සිට දැවැන්ත හමුදා මෙහෙයුමක් ආරම්භ කිරීමත් සමඟය. 2011 වසරේදී ද මේ අයුරින්ම හමුදා නිල ඇඳුමින් සැරසුණු සටන්කාමීහු පිරිසක් පාකිස්තානයේ කරච්චි නුවර ගුවන් හමුදා කඳවුරට කඩා වැදී පහර දුන්හ. එම අවස්ථාවේදී ආරක්ෂක අංශ සහ සටන්කාමීන් අතර පැය 17 ක් තිස්සේ දරුණු සටන් පැවැතිණි. එම ප‍්‍රහාරය එල්ල කළේ තලේබාන් සටන්කාමීන්ය. ප‍්‍රහාරයෙන් පසු කඳවුරේ ආරක්ෂාව තහවුරු කර ඇති අයුරු