ආයුධ සන්නද්ධ පිරිසක් මධ්‍යම සිරියාවේ අල් කුබේර් නමැති ගම්මානයට කඩා වැදී පෙරේදා (06) එල්ල කළ වෙඩි තැබීම්වලින් කාන්තාවන් සහ ළමයින් ද ඇතුළු 80 දෙනෙක් ජීවිතක්ෂයට පත් වූහ. සිරියා කැරැලිකාර පාර්ශ්වය නියෝජනය කරන දේශපාලන හඬ වන ‘සිරියා ජාතික පාලක මණ්ඩලය ප‍්‍රකාශ කළේ එය සිරියා ජනපති බෂීර් අල් අසාද්ට හිතවත් ආයුධ සන්නද්ධ සටන්කාමීන් පිරිසක් එල්ල කළ ප‍්‍රහාරයක් කියාය. සිරියා රජය පවසන්නේ එම ප‍්‍රහාරයේ වගකීම තම කරපිට පැටැවීමට කැරැුලිකාර පාර්ශ්වය උත්සාහ ගන්නා බවය. මේ අයුරින් මීට සති කිහිපයකට පෙර සිරියාවේ හූලා නමැති නගරයේ ද මහා සමූල ඝාතනයක් සිදුවිය. එහිදී කුඩා දරුවන් සහ කාන්තාවන් ද ඇතුළු සිවිල් වැසියෝ 108 දෙනෙක් ජීවිතක්ෂයට පත්වූහ. සිරියාවේ ගැටුම් නතර කිරීමට හැකි එකම මාර්ගය වන්නේ තමන් ඉදිරිපත් කළ සාම යෝජනාවලිය බවත් එහි කොන්දේසි අනුව කටයුතු කළ යුතු බවත් එක්සත් ජාතීන්ගේ සංවිධානය යළිත් වරක් සිරියා රජයට සහ කැරැුලිකාර පාර්ශ්වයට අවධාරණය කර තිබේ. මේ අතර සිරියාවේ පවතින අර්බුදයට විසඳුම් සෙවීමේ අරමුණින් ගෝලීය සමුළුවක් පැවැත්විය යුතු යැයි රුසියාව යෝජනා කරයි. එම සමුළුවට මැදපෙරදිග රටවල් සහ ඉරානය ද සහභාගී කරවා ගත යුතු යැයි ද රුසියාව පවසයි. රුසියාවේ මෙම යෝජනාව බටහිර රටවල දැඩි විරෝධයට හේතු වී ඇත. ඉරානය කිසිම ජාත්‍යන්තර සමුළුවකට සහභාගී කර නොගත යුතු යැයි ප‍්‍රංශ රජය පවසා තිබේ.