සිරියා හමුදාව සහ කැරැලිකරුවන් අතර ඊයේ (16) හටගත් දරුණු ගැටුමකින් හමුදා සෙබළුන් 21 දෙනකු ජීවිතක්ෂයට පත් වූ අතර එම සෙබළුන් සමඟ සිටි එක්සත් ජාතීන්ගේ සාම නිරීක්ෂකයෝ සය දෙනෙක් කැරැලිකරුවන්ගේ ග‍්‍රහණයට අසුවූහ. හමුදා බළඇණිය කැරැලිකරුවන්ගේ ප‍්‍රහාරයට අසුවූයේ ඉබ්ලිබ් පළාතේ කාන් ෂෙයිකුම් නගරයේදීය. එක්සත් ජාතීන්ගේ සාම නිරීක්ෂකයන් කැරැලිකරුවන් අතට පත් වූයේ හමුදාව සහ කැරැලිකරුවන් අතර වෙඩි හුවමාරු සිදුවෙද්දීය. සාම නිරීක්ෂකයන් තම ග‍්‍රහණයට ගත්තේ ඔවුන්ට අනතුරක් වීමට ඉඩ තිබූ නිසා යැයි සිරියා කැරැලිකරුවෝ පවසති. මේ වනවිට එම නිරීක්ෂකයන්ට පූර්ණ ආරක්ෂාවක් ලබා දී ඇතැයි ද ඔවුහු වැඩි දුරටත් කියා සිටිති. එක්සත් ජාතීන්ගේ සංවිධානය ඊයේ නිකුත් කළ නිවේදනයක දැක්වූයේද තම සාම නිරීක්ෂකයන් හය දෙනකු මිත‍්‍රශීලී පරිසරයක කැරැලිකරුවන්ගේ රැකවරණ ලබමින් සිටින බවය. මේ අතර සිරියාවේ ඩාරා පළාතේ පිහිටි පලස්තීන සරණාගත කඳවුරකට සිරියා හමුදා සෙබළුන් පහර දුන් අතර එම ප‍්‍රහාරයෙන් කුඩා දරුවකු ඇතුළු සිවු දෙනෙක් ජීවිතක්ෂයට පත්වූහ. සිරියා හමුදා එම කඳවුරට පහරදී ඇත්තේ එහි කැරැුලිකරුවන් සැඟවී සිටින බව පවසමින්ය.