සිරියා හමුදා ඉකුත් සිකුරාදා (22) තුර්කියට අයත් ප‍්‍රහාරක ජෙට් යානයක් වෙඩි තබා බිම හෙළීමත් සමඟ සිරියාවත් තුර්කියත් අතර හටගෙන ඇති අර්බුදය සාමකාමීව විසඳා ගන්නැයි ඉරානය දෙරටේම රාජ්‍ය නායකයන්ගෙන් ඉල්ලීමක් කරයි. සිරියා රජය පවසන්නේ තුර්කි යානය සිරියා මුහුදු දේශසීමාවට අනවසරයෙන් ඇතුළු වී ඉතා පහළින් පියාසර කිරීම නිසා ඊට වෙඩි තැබූ බවය. එහෙත් තුර්කිය පවසන්නේ තම ගුවන් යානය සිරියා ගුවන් සීමාවට ඇතුළු නොවුණු බවය. යානය බිම හෙළීම සම්බන්ධයෙන් සිරියා රජයට දොස් පවරන තුර්කිය පවසා ඇත්තේ සිරියා රජයේ එම කි‍්‍රයා කලාපය කිසිසේත් අනුමත කළ හැකි දෙයක් නොවන බවය. තුර්කි අගමැති රිසෙප් එර්ඩගෝන් ඊයේ (24) විශේෂ මාධ්‍ය හමුවක් පවත්වමින් කියා සිටියේ තම ජෙට් යානය සිරියා ගුවන් කලාපයට ඇතුළු නොවූ බවත් එය පියාසර කරමින් තිබුණේ ජාත්‍යන්තර ගුවන් කලාපයට අයත් ගුවන් සිමාවේ බවත්ය. වෙඩි තැබීමට විරෝධය පළ කරමින් සිරියා රජයට එරෙහිව දැඩි කි‍්‍රයා මාර්ග අනුගමනය කරන බව තුර්කිය පවසයි. එම ‘දැඩි කි‍්‍රයා මාර්ග’ මොනවාදැයි තුර්කි අගමැතිවරයා හෙළි කර නැත. කෙසේ නමුත් මධ්‍යධරණී මුහුදට කඩා වැටුණු ප‍්‍රහාරක ජෙට් යානයේ සිටි නියමුවන් දෙදෙනා සෙවීමට තුර්කි නාවික හමුදාවත් සිරියා හමුදාවත් එක් වී කටයුතු කරන බව ද වාර්තා වේ.