සිරියා හමුදා එරට ඇලෙප්පෝ නුවර කැරැලිකරුවන් ඉලක්ක කර ගනිමින් ඊයේ (24) එල්ල කළ ගුවන් ප‍්‍රහාරවලින් එකම පවුලේ දරුවන් තිදෙනකු ඇතුළු සිවිල් වැසියෝ පස් දෙනෙක් ජීවිතක්ෂයට පත්වූහ. එම දරුවන් තිදෙනා ඔවුන්ගේ මව සමඟ සැඟවී සිටි ගොඩනැගිල්ල ගුවන් ප‍්‍රහාරවලින් මුළුමනින්ම බිමට සමතලා වූ බවත් ගොඩනැගිල්ලේ සුන්බුන්වලට දරුවන් තිදෙනාත් මවත් යට වූ බවත් සිරියානු මානව හිමිකම් සුරැකීමේ සංවිධාන පවසයි. ඇලෙප්පෝ නගරයට එල්ල කළ එම ගුවන් ප‍්‍රහාරවලින් 15 දෙනකු තුවාල ලැබූ බව ද වාර්තා වේ. මියගිය සහ තුවාල ලැබූවන් ආයුධවලින් සන්නද්ධ කැරැලිකරුවන් නොවන බවත් ඔවුන් සිවිල් වැසියන් බවත් මානව හිමිකම් සුරැකීමේ සංවිධානය වැඩි දුරටත් කියා සිටී. මේ අතර තුර්කි දේශසීමාවට යාබදව, නිදහස් සිරියානු හමුදාව යනුවෙන් හැඳින්වෙන කැරැලිකාර පාර්ශ්වයේ ග‍්‍රහණයේ පවතින නගර කිහිපයක් ඉලක්ක කර ගනිමින් ද සිරියානු රජයේ හමුදා පෙරේදා (23) එල්ල කළ එම ගුවන් ප‍්‍රහාරවලින් කැරැලිකරුවෝ 40 දෙනෙක් ජීවිතක්ෂයට පත්වූහ. කැරැලිකරුවන් මේ වනවිට ඔවුන් අත්පත් කරගෙන සිටින නගරවල කඳවුරු පිහිටුවා ඇති අතර ඔවුන් පවසන්නේ ඩමැස්කස් අගනුවර අත්පත් කර ගැනීම ඔවුන්ගේ මීළඟ ඉලක්කය බවය. මේ වනවිට කැරැලිකරුවෝ හොම්ස් ප‍්‍රාන්තය, දීර් එසෝර් සහ ඩමැස්කස් අගනුවර ප‍්‍රදේශ කිහිපයක් අත්පත් කර ගෙන සිටිති. දේශසීමා නගරවලට පහරදීම සඳහා සිරියානු හමුදාව ප‍්‍රහාරක ජෙට් යානාවලට අමතරව ප‍්‍රහාරක හෙලිකොප්ටර් යානා ද යොදා ගත් බව වාර්තා වේ. සිරියාව පුරා මේ අයුරින් දරුණු ගැටුම් ඇතිවෙද්දී, සිරියාවේ අර්බුදය විසඳීමට පත් කරනු ලැබූ එක්සත් ජාතීන්ගේ සාම නියෝජිත ලක්දාර් බ‍්‍රහීමී ඊයේ ඇමෙරිකාවේ නිව්යෝක් නුවරදී එක්සත් ජාතීන්ගේ ආරක්ෂක මණ්ඩලය රැුස්කර සිරියා අර්බුදය ගැන යළිත් වරක් සාකච්ඡා පැවැත්වීය. මාස 18 කට වැඩි කාලයක් තිස්සේ දිග්ගැස්සෙමින් පවතින සිරියා අර්බුදය හේතුවෙන් මේ වනවිට 27,000 කට වැඩි පිරිසක් ජීවිතක්ෂයට පත්ව ඇත. ලක්දාර් බ‍්‍රහීමී එක්සත් ජාතීන්ගේ ආරක්ෂක මණ්ඩලයේ සාමාජික රටවලින් ඉල්ලා සිටියේ සිරියානු කැරැලිකරුවන්ට හෝ සිරියානු රජයට හෝ සහාය දීමෙන් වැළැකී සිටින ලෙසටය. සිරියා අර්බුදය හේතුවෙන් ලෝකය මේ වනවිට බල කඳවුරු දෙකකට බෙදී ඇත. ඇමෙරිකාව, බි‍්‍රතාන්‍ය ප‍්‍රමුඛ බටහිර සහාය හිමිවන්නේ කැරැලිකාර පාර්ශ්වයටය. ඉරානය, චීනය සහ රුසියාවේ සහාය හිමිවන්නේ සිරියා ජනපති අසාද්ගේ රජයටය. සිරියාවට එරෙහි ප‍්‍රහාරයක් එල්ල කිරීමට එක්සත් ජාතීන්ගේ ආරක්ෂක මණ්ඩලය උත්සාහ කළ සෑම අවස්ථාවකදීම ඊට විරෝධය දැක් වූයේ චීනය සහ රුසියාවයි. කැරැලිකරුවන් සමඟ සටන් කරන සිරියානු ජනාධිපති බෂීර් අල් අසාද්ගේ රජයට සහාය දීමට තම විප්ලවීය හමුදාවේ හමුදා ප‍්‍රධානීන් පිරිසක් සිරියාවට යැවූ බව ඉරානය ද පවසා ඇත. ඩමැස්කස් සහ ඇලෙප්පෝ නගර අල්ලා ගැනීමට වෙර දරන කැරැලිකරුවන්ට එරෙහි සටන් කිරීමට සිරියා හමුදාවට තම හමුදා ප‍්‍රධානීන්ගේ සහාය නොඅඩුව ලබා දෙන බව ද ඉරාන රජය පසුගියදා පැවැසීය.