සිරියානු ජනාධිපති බෂීර් අල් අසාද්ගේ පාලනය අවසන් කිරීමේ අරමුණින් සටන් කරන සිරියානු කැරැලිකරුවන්ට ආයුධ දීමට තමන් සූදානම් යැයි ප‍්‍රංශය සහ බි‍්‍රතාන්‍යය ඊයේ (14) නිවේදනය කළේය.
මීළඟ යුරෝපා සංගම් මැතිවරණයේදී සිරියානු කැරැලිකරුවන්ට ආයුධ ලබා දීමට පනවා ඇති තහනම, තම නිෂේධ බලය භාවිත කොට ඉවත් කරන බව බි‍්‍රතාන්‍ය අගමැති ඬේවිඞ් කැමරන් මීට පෙර පවසා තිබුණි.
කෙසේ නමුත් බි‍්‍රතාන්‍ය රජය සහ ප‍්‍රංශ රජය ඊයේ කියා සිටියේ යුරෝපා සංගම් මැතිවරණයේදී කුමන තීරණයක් ගත්තත්, තමන් සිරියානු කැරැලිකරුවන්ට අවි ලබා දීමට කටයුතු කරන බවය.
සිරියානු අර්බුදයට දේශපාලනික පිළියමක් සෙවීමේ අරමුණින් සිරියා රජයේ මිතුරකු වන රුසියාවේ විදේශ ඇමැති සර්ගේ ලෙව්රෝව් බි‍්‍රතාන්‍යයේ ලන්ඩන් නුවරට පැමිණ සිටින අතර බි‍්‍රතාන්‍යය සහ ප‍්‍රංශය ගත් එම තීරණයට ඔහුගෙන් දැඩි විරෝධය එල්ල විය.
යුරෝපා සංගමයට තුළ සිරියාවට එරෙහිව අවි තහනමක් කි‍්‍රයාත්මක වන්නේ ඉකුත් මාර්තු පළමු වැනිදා සිටය. 
එම තහනම යටතේ යුරෝපා සංගමයට අයත් රටවලට සිරියානු රජයට හෝ කැරැලිකරුවන්ට හෝ අවි ආයුධ දීම කළ නොහැක.
බි‍්‍රතාන්‍ය අගමැතිවරයා පවසා තිබුණේ සිරියානු ජනාධිපති බෂීර් අල් අසාද්ගේ පාලනය පෙරළා දැමීමට උත්සහ ගන්නා සිරියානු කැරැුලිකාර පාර්ශ්වයට පමණක් ආයුධ ලබා දීමට තමන් පියවර ගන්නා බවය. 
රුසියාව පමණක් නොව සිරියා රජය පවා චෝදනා කරන්නේ දැනටමත් අනවසර ලෙස ඇමෙරිකාවත්, බි‍්‍රතාන්‍යයත් සිරියානු කැරැලිකරුයවන්ට අවි ආයුධ දෙන බවටය.
අරාබි වසන්තය හරහා සිරියානු අර්බුදය ආරම්භ වූයේ 2011 වසරේ මාර්තු මාසයේදීය. සිරියානු විපක්ෂ කණ්ඩායම්, මානව කි‍්‍රයාකාරීන් ආයුධ අතට ගෙන සිරියා රජයට එරෙහිව සටන් ආරම්භ කිරීමත් සමඟ සිරියා රජය එම කැරැලිකරුවන්ට ප‍්‍රතිප‍්‍රහාර එල්ල කරන්න විය.
එක්සත් ජාතීන්ගේ සංවිධානය පවසන්නේ මේ වනවිට 76,000 කට වැඩි පිරිසක් ජීවිතක්ෂයට පත්ව ඇති බවය.
එක්සත් ජාතීන්ගේ සංවිධානය එසේ පවසා ඇත්තේ සිරියානු මානව හිමිකම් සංවිධාන සහ එරට කැරැලිකරුවන් විසින් පිහිටුවනු ලැබූ ‘සිරියානු ජාතික පාලක මණ්ඩලය’ ලබා දුන් තොරතුරු පාදක කර ගනිමිනි. සිරියානු රජය පවසන්නේ ගැටුම්වලින් එතරම් පිරිසක් මියගොස් නැති බවය.
මාස 21 කට වැඩි කාලයක් තිස්සේ සිරියාවේ පවතින ගැටුම්වලට පැහැදිලි විසඳුමක් ලබා දීමට සිරියානු ජනපති බෂීර් අල් අසාද්ගේ රජය අපොහොසත් නම්, ඔවුන් ජාත්‍යන්තර අපරාධ අධිකරණය හමුවට ඉදිරිපත් කළ යුතු යැයි එක්සත් ජාතීන්ගේ ආරක්ෂක මණ්ඩලය පවසයි.
සිරියා ජනපතිගේ රජය මිනිස් ඝාතන සිදු කරමින්, මානව වර්ගයාට එරෙහිව අපරාධ සිදු කරන බවටත්, බලයෙන් ඉවත් වීම ප‍්‍රතික්ෂේප කරන එරට ජනාධිපති අසාද් ඇතුළු ඉහළ පෙළේ රාජ්‍ය සහ ආරක්ෂක නිලධාරීන් ඊට වගකිව යුතු යැයි මානව හිමිකම් සංවිධාන චෝදනා කරයි.

රුසියානු විදේශ ඇමැති සර්ගේ ලෙව්රෝව් (දකුණේ) සහ  බි‍්‍රතාන්‍ය විදේශ ලේකම් විලියම් හේග් මාධ්‍ය හමුවට සහභාගී වෙමින් ...