හියුගෝ චාවේස්ගේ අභාවයෙන් පසු, ලබන 14 වැනිදා පැවැත්වීමට නියමිත එරට මහ මැතිවරණයට ඉදිරිපත් වන භාරකාර ජනපති නිකලස් මදුරෝ ඊයේ (3)  චාවේස්ගේ උපන් ගම වන සබනේටාහිදී සිය මැතිවරණ ප‍්‍රචාරණ කටයුතු නිල වශයෙන් ආරම්භ කළේය.
මියයෑමට පෙර තම අනුප‍්‍රාප්තිකයා ලෙස චාවේස් නම් කළේ නිකලස් මදුරෝය. ඔහු වෙනිසියුලාවේ උප ජනපති ධුරය ද හෙබවීය. ඔහු වෙනිසියුලාවේ භාරකාර ජනපති ධුරයට පත් වූයේ චාවේස්ගේ අභාවයෙන් පසුවය.
1962 වසරේ නොවැම්බර් 23 වැනිදා උපන් මදුරෝ බස් රථ රියැදුරෙකි. ඔහු දේශපාලනයට අවතීර්ණ වූයේ වෘත්තීය සමිති නායකයකු ලෙසය. චාවේස් ඉකුත් දෙසැම්බරයේ පිළිකා සැත්කමට භාජන වීමට කියුබාවේ හවානා නුවර බලා ගිය අවස්ථාවේදී මදුරෝට බලය පැවැරීමක් ද කළේය.
1994 වසරේ සිට චාවේස් සමීපව ඇසුරු කළත්, මදුරෝ වෙනිසියුලාවේ දේශපාලන කරළියට පිවිසියේ 2006 වසරේදීය.
එවකට චාවේස්ගේ රජයේ විදේශ කටයුතු ඇමැති ධුරය හෙබවූයේ ඔහුය. ඔහු උප ජනපති ධුරයට පත්වුණේ ඉකුත් වසරේ ඔක්තෝබර් මාසයේ 7 වැනිදා පැවැති මැතිවරණයෙනි.
නිකලස් මදුරෝ මොරෝස් උපන්නේ වෙනිසියුලාවේ කැරකස් නුවරදීය. ඒ, 1962 වසරේ නොවැම්බර් 23 වැනිදා ය. රජය පෙරැළීමට ගත් අසාර්ථක හමුදා කුමන්ත‍්‍රණයකින් චාවේස් සිර දඬුවම් විද 1994 වසරේ සමාව ලැබ නිදහස් වූ අවස්ථාවේ සිට ඔහුගේ සමීපතමයකු වූයේ මදුරෝ ය. එනිසා ඔහුට චාවේස්ගේ ගෞරවයත් ආදරයත් හිමිවිය.
ජනපතිවරණයේ දී මදුරෝට වෙනිසියුලානු විපක්ෂ නායක හෙන්රීකේ කැප්රිලේගෙන් අභියෝගයක් එල්ලවනු ඇතැයි දේශපාලන විචාරකයෝ පෙන්වා දෙති.

මදුරෝ මැතිවරණ කටයුතු ආරම්භ කරමින් ...