දේශසීමා ආරක්ෂාව තර කිරීමටත් දේශසීමා පිවිසුම් මාර්ග වසා දැමීමටත් වෙනිසියුලාව ඊයේ (10) තීරණය කළේය.
වෙනිසියුලා රජය එම තීරණය ගත්තේ ලබන 14 වැනිදා පැවැත්වීමට නියමිත ජනාධිපතිවරණය නිමිත්තෙනි.
වෙනිසියුලාවේ ජනපතිවරණයක් පැවැත්වෙන්නේ එරට සමාජවාදී නායක හියුගෝ චාවේස්ගේ අභාවයෙන් පසුවය.
චාවේස් තම අනුප‍්‍රාප්තිකයා ලෙස නම් කළ හිටපු උප ජනපති නිකලස් මදුරෝ සහ විපක්ෂ නායක හෙන්රීකේ කැප්රිලේස් අතර ඡුන්ද සටන පැවැත්වෙනු ඇත.
මේ වනවිට වෙනිසියුලාවේ භාරකාර ජනපතිවරයා ලෙස කටයුතු කරන්නේ මදුරෝය. ජනපතිවරණයට සමගාමීව ප‍්‍රචණ්ඩ කි‍්‍රයා වර්ධනය වීමේ අවදානමක් ඇති හෙයින් ප‍්‍රධාන නගරවලට විශේෂ ආරක්ෂාවක් යෙදවීමට ද මදුරෝ කටයුතු කර ඇත.
එපමණක් නොව පසුගියදා පැවැති ජන රැලියකදී මදුරෝ කියා සිිටියේ රටේ දුෂණ වංචාවලට තමන් කිසිදු ඉඩක් ලබා නොදෙන බවත් ඊට එරෙහිව සටන් කිරීමට තමා දිවි හිමියෙන් කටයුතු කරන බවත්ය.