චීනයේ ගුවන්ග්ඩොන්ග් ප්‍රාන්තයේ යැන්ග්ජි ප්‍රදේශයේ ඉදිකැරෙන නවතම කාර්යාල සංකීර්ණයකට අවශ්‍ය ඉඩම් වෙන්කර ගැනීම පසුගිය කාලය පුරාම සිදුවිය.ඉඩම් අහිමි වන ප්‍රදේශවාසීන් වෙනුවෙන් නව නිවාස ඉදිකර දීමටත් වන්දි  ප්‍රදානය කිරීමටත් කාර්යාල සංකීර්ණයේ ඉදිකිරීම් කටයුතු භාරව සිටිනා කොන්ත්‍රාත්කරුවන් කටයුතු කර තිබුණි.

එසේ වුවද තමන්ට හිමිවන වන්දිය   කිසිසේත් ප්‍රමාණවත් නොවන බවත් කිසිවකුත් කියූ පලියට සිය නිවාස අතහැර යාමට තමන් සූදානම් නැති බවත් කියමින් කැරලි ගැසූ වැසියන් කිහිපදෙනෙක්ද ප්‍රදේශවාසීන් අතර වුහ.කොන්ත්‍රාත්කරුවන් කොතෙකුත් උත්සාහ කළද සිය ස්ථාවරය වෙනස් කළේ ඔවුන් නම් නොවේ.

සිය ඉදිකිරීම් කටයුතු හොදින් බැරිනම් නරකින් නිම කර ගැනීමට කොන්ත්‍රාත්කරුවන් තීරණය කරන්නේ ඇවිටිලි කර බැරිම තැනය.ප්‍රදේශයේ ගලා බසිනා ගංගාවක   ගමන් මාර්ගය වෙනස් කර ‘‘කැරලිකරුවන්ගේ‘‘  නිවාස වටකරමින් ගලා යාමට සලස්වන්නේ දැන්වත් මොවුන් සටන අත්හරී යැයි සිතා ගෙනය.

කොන්ත්‍රාත්කරුවන් කුමන ක්‍රියාමාර්ගයක් ගත්තද තමන්ගේ තීරණය නම් වෙනස් නොකරන බව මේ වැසියෝ පවසති.නිවාස වටකරමින් ‘‘ගගක්‘‘ ගලා ගියද ගගට උඩින් පාලම් දැමිීමට තමන්ට හැකි බව ඔවුන් කියා සිටී.තමන් එළැවීමේ අරමුණින් කොන්ත්‍රාත්කරුවන් සිය නිවෙස් වලට සැපයෙන විදුලි බලය නළ ජලය ආදී පහසුකම් කප්පාදු කළ බව පවසන ඔවුන් තමනට සතුටුදායක වන්දියක් ප්‍රදානය කිරීමට කොන්ත්‍රාත්කරුවන් කටයුතු කරන තෙක් සටන අත්නොහරින බව කියයි.