යේමන ආරක්ෂක ඇමැති මොහොමඞ් නසර් අහමඞ් ගමන් ගත් රථපෙළ ඉලක්ක කරගෙන පෙරේදා(12) එල්ල වූ කාර් බෝම්බ ප‍්‍රහාරයෙන් 12 දෙනෙක් ජීවිතක්ෂයට පත් වූ අතර ඇමැති නසර් අහමඞ් ඉන් දිවි ගලවා ගැනීමට සමත් වූ බව යේමන රජය පවසයි. ඇමැතිවරයා ඉලක්ක කරගෙන මෙම ප‍්‍රහාරය එල්ල වූයේ යේමනයේ හිටපු ජනපති අලි අබ්දුල්ලා සාලේට නිදහස ලබා නොදෙන ලෙස පවසමින් එරට වැසියන් දෙලක්ෂයකට ආසන්න පිරිසක් සානා නුවර විරෝධතාවක නිරතවෙමින් සිටි අවස්ථාවකදීය. ප‍්‍රහාරයෙන් ජීවිතක්ෂයට පත්වූවන් අතර ආරක්ෂක ඇමැතිවරයාගේ ආරක්ෂක භටයන් හත් දෙනකු සිටින බවද වාර්තා වේ. මැදපෙරදිග කලාපයේ ත‍්‍රස්තවාදී මෙහෙයුම් බාරව කි‍්‍රයා කළ අල් කයිඩා සංවිධානයේ දෙවැනි නායකයා වූ සයීඞ් අල් ෂේරි යේමන හමුදා අතින් ඝාතනයවීමෙන් දිනකට පසුව මෙම ප‍්‍රහාරය එල්ල වී තිබේ. මේ වන තෙක් කිසිදු පාර්ශවයක් ප‍්‍රහාරයේ වගකීම බාර ගෙන නොමැති බව එරට රජයේ ප‍්‍රකාශකයකු සඳහන් කළේය. ඉකුත් මැයි මාසයේදී අල් කයිඩා සටන්කාමීන් යේමන අගනුවරට දරුණු ප‍්‍රහාරයක් එල්ල කළ අතර ඉන් සෙබළු සියයක් ජීවිතක්ෂයට පත් වූහ. එම ප‍්‍රහාරයේ ඉලක්කය වූයේද ඇමැති නසර් අහමඞ්ය.