ප‍්‍රජාතන්ත‍්‍රවාදය ස්ථාපිත කර, මියන්මාරයට නායකත්වය දීමට තමා  ඕනෑම අවස්ථාවක සූදානම් බව බි‍්‍රතාන්‍යයේ සංචාරයක යෙදෙන එරට විපක්ෂ නායිකාව මෙන්ම ප‍්‍රජාතන්ත‍්‍ර නායිකාව ද වන අවුන් සාන් සූ කී පවසයි. සූ කී මේ බව කියා සිටියේ ලන්ඩන් නුවරදී බී.බී.සී. පුවත් සේවය සමඟ සම්මුඛ සාකච්ඡුාවකට එක් වෙමිනි. මියන්මාරයේ මීළඟ මහ මැතිවරණය පැවැත්වීමට නියමිතව තිබෙන්නේ 2015 වසරේදීය. ”රටට නායකත්වය දෙන්න මා  ඕනෑම මොහොතක සූදානම්. මා දන්නවා ජනතා සහාය මට නොඅඩුව ලැබෙනවා. මියන්මාරයට ප‍්‍රජාතන්ත‍්‍රවාදය ගෙන ඒමට මා  ඕනෑම මොහොතක සූදානම්” යැයි සූ කී බී.බී.සී. පුවත් සේවය සමඟ පැවැසීය. සූ කී බි‍්‍රතාන්‍යයට පැමිණියේ පෙරේදා (19) ය. ඇගේ 67 වැනි උපන්දිනය ද එදිනට යෙදී තිබුණි. ලන්ඩන් නුවරට පැමිණි ඇයට බි‍්‍රතාන්‍ය වැසියන්ගෙන් පමණක් නොව බි‍්‍රතාන්‍යයේ වෙසෙන මියන්මාර ජාතිකයන්ගෙන් ද ඉතා උණුසුම් පිළිගැනීමක් ලැබුණි. ලන්ඩන් ආර්ථික විද්‍යා පීඨයේ සිසු සිසුවියන් හමුවේ දේශනයක් කළ සූ කී කියා සිටියේ තමන්ගේ මුරණ්ඩුකම නිසා කරදරේ වැටී, අභියෝගවලට මුහුණ දීමට සිදුවුණු තමන්ට, ශක්තිය සහ ධෛර්යය ලැබුණේ ජනතාව තමන් සමඟ සිටීම නිසා කියාය. ලන්ඩන් ආර්ථික විද්‍යා පීඨයේ දේශනයෙන් පසු ඇය ඔක්ස්ෆර්ඞ් බලා පිටත්ව ගියාය.