මියන්මාර හමුදාව සමඟ සබඳතා ඇති කර ගනිමින්, ආරක්ෂක ගිවිසුම් කිහිපයකට අත්සන් තැබීමට ඇමෙරිකාව සූදානම් බව ඇමෙරිකා ආරක්ෂක ලේකම් ලියොන් පැනේටා පවසයි. ”මියන්මාරයේ සිදුවන දේශපාලන පෙරැළිය සතුටුදායකයි. මියන්මාර සිවිල් රජය දේශපාලන ප‍්‍රතිසංස්කරණ රැසක් කි‍්‍රයාවට නංවා තිබෙනවා. ඒවා ගැන ඇමෙරිකා රජය පැහැදීමකට ලක් වී සිටිනවා. ආසියා කලාපයේ ආරක්ෂාව තහවුරු කිරීමේ අරමුණ ඇතිව මියන්මාර හමුදාව සමඟ ආරක්ෂක ගිවිසුම් කිහිපයකට අත්සන් තැබීමට ඇමෙරිකා රජය සූදානම් වෙනවා” යැයි පැනේටා කියා සිටියේ පෙරේදා (2) සිංගප්පූරුවේ පැවැත්වුණු ආසියා ආරක්ෂක සමුළුවට සහභාගී වූ අවස්ථාවේදීය. මියන්මාර නව සිවිල් රජය හඳුන්වා දුන් දේශපාලන ප‍්‍රතිසංස්කරණ ගැන පැහැදීමට ලක් ව සිටින ඇමෙරිකා රජය මේ වනවිට මියන්මාරයට පනවා තිබූ සම්බාධක ලිහිල් කිරීමට ද කටයුතු කර තිබේ. ඇමෙරිකාව පමණක් නොව එක්සත් ජාතීන්ගේ සංවිධානය, යුරෝපා සංගමය සහ සෙසු බටහිර රටවල් ද මියන්මාරයට එරෙහිව පනවා තිබුණු සම්බාධක ලිහිල් කිරීමට කටයුතු කර ඇති අතර මියන්මාරය සමඟ තානාපති සබඳකම් ද ආරම්භ කර තිබේ. ඇමෙරිකාව සහ සෙසු බටහිර රටවල් මියන්මාරයට සම්බාධක පැනවූයේ මියන්මාරයේ වසර 60 කට ආසන්න කාලයක් තිස්සේ පැවැති හමුදා පාලනයට විරෝධය පළ කරමින්ය. එහෙත් 2010 වසරේ මහ මැතිවරණයෙන් පසු දැන් මියන්මාරයේ පවතින්නේ සිවිල් රජයකි. එම රජය, නව දේශපාලන ප‍්‍රතිසංස්කරණ හඳුන්වා දෙමින්, ඒවා නිසි ලෙස කි‍්‍රයාත්මක කිරීම නිසා මියන්මාරයේ දේශපාලනයේ පෙරැළියක් සිදු කර ඇත. ආසියා රටවල මෙන්ම බටහිර රටවල ද අවධානය මේ වනවිට මියන්මාරයට යොමු වී ඇත්තේ එහෙයිනි.