අභාවප‍්‍රාප්ත බි‍්‍රතාන්‍යයේ හිටපු අගමැතිනී මාග‍්‍රට් තැචර්ගේ අවසන් කටයුතු ලබන සතියේ පූර්ණ රාජ්‍ය සහ හමුදා ගෞරව මැද පැවැත්වෙනු ඇතැයි බි‍්‍රතාන්‍ය රජය ඊයේ (9) නිවේදනය කළේය.
දේශපාලන වශයෙන් හා නායකත්වය අතින් ඇය තුළ පැවති තිරසාර ගුණාංග නිසා යකඩ ගැහැනියක බවට පත් වූ තැචර් ආදිපාදවරිය බි‍්‍රතාන්‍යයේ කොන්සර්වටිව් පක්ෂයට නායකත්වය දෙමින් කි‍්‍රයාත්මක කළ දේශපාලන හා ආර්ථික ප‍්‍රතිපත්ති බොහෝදෙනාගේ පැසසුමට ලක්විය. ඇගේ අවසන් කටයුතු පූර්ණ රාජ්‍ය සහ ගෞරව සහිතව සිදු කිරීමට නියමිත බවත් අවමංගල දේව මෙහෙය ශාන්ත පෝල් දෙව් මැඳුරේ පැවැත්වෙනු ඇති බවත් බි‍්‍රතාන්‍ය රජය වැඩිදුරටත් කියා සිටී.
බි‍්‍රතාන්‍යයේ ප‍්‍රථම සහ එකම අගමැතිවරිය වන ඇය කොන්සවර්ටිව් පක්ෂයට නායකත්වය දෙමින් පිට පිට තෙවරක් බි‍්‍රතාන්‍ය අගමැති ධුරය හෙබ වූවාය. දීර්ඝ කාලයක් පුරා උග‍්‍ර රෝගී තත්ත්වයකින් පීඩා විඳි ඇය, මොළයේ ලේ කැටියක් සිරවීමෙන් පෙරේදා (8) මෙලොවින් සමුගත්තාය. මිය යන විට ඇගේ වයස අවුරුදු 87 කි.