16 වැනි ශුද්ධෝත්තම බෙනඩික් පාප්තුමන් සිය පදවියෙන් ඉල්ලා අස්වීමට තීරණය කිරීම ලෝ පුරා කතෝලික බැතිමතුන් තුළ කම්පනයක් ඇති කිරීමට සමත් වී ඇත.
අයහපත් සෞඛ්‍ය තත්ත්වය හේතුවෙන් තමන් ඉල්ලා අස්වන බව 16 වැනි බෙනඩික් පාප්තුමන් නිල වශයෙන් නිවේදනය කළේ පෙරේදා (11) ය.
එතුමන් ඉල්ලා අස්වීමට සැරසෙන බව එතුමන්ගේ සමීපතමයන් පවා දැන නොසිටි බව මාධ්‍ය වාර්තා කළේය. ඒ අනුව කාගේ හෝ බලපෑමක් මත පාප්තුමන් ඉල්ලා අස්වූයේදැයි සැකයක් බටහිර මාධ්‍ය ඇති කර තිබුණි.
කෙසේ නමුත් 85 හැවිරිදි බෙනඩික් පාප්තුමන් පැහැදිලි කළේ පාප් පදවියේ රැඳී සිටිමින් කටයුතු කිරීමට තරම් කායික ශක්තියක් තමන්ට නැති බවය.
16 වැනි පාප්තුමන් ලෙස එම ධුරයට පත් වූයේ ජර්මන් ජාතික කාඩිනල් පියතුමකුව සිටි ජෝසප් ඇලෝසියස් රැත්සිංගර් ය. එතුමන් 2005 වසරේ දී එම පදවියට තේරී පත් වූයේ ශුද්ධෝත්තම දෙවැනි ජෝන් පාවුල් පාප්තුමන්ගේ අභාවයෙන් පසුවය.
පාප් පදවියට පත් වූ අවස්ථාවේ සිටම එතුමන් කියා සිටියේ තමන් එම පදවියට පත් වේවි යැයි කිසිදා නොසිතූ බවය. ලෝක සාමය සහ ආගමික සමඟිය ඇති කිරීම කෙරෙහි පාප්තුමන් පසුගිය වසර කිහිපයේ කැප වී කටයුතු කිරීමෙන් ලොව සියලූම ආගම්වල පැසැසුමටත් ගෞරවයත් පාත‍්‍ර වූයේය.
එම හේතුව නිසාම එතුමන් ඉල්ලා අස්වීමට ගත් තීරණය රෝමානු කතෝලික පල්ලියට, කි‍්‍රස්තියානි ප‍්‍රජාවට පමණක් නොව මුළු මහත් ලොවටම කම්පනයක් විය.