ආරක්ෂක හේතූන් සැලකිල්ලට ගෙන පාකිස්තානයේ නව අගමැති රාජා පර්වේස් අෂ්රාෆ්ගේ නිවසේ හෙලිකොප්ටර් ගොඩබෑමට රජයේ වියදමින් අංගනයක් ඉදිකිරීමට පාකිස්තාන රජය ගත් තීරණයට එරට ජනතාවගේ විරෝධය එල්ල වෙමින් පවතී. අගමැති අෂ්රාෆ්ගේ නිවස පිහිටා ඇත්තේ ඉස්ලාමාබාද් අගනුවර සිට සැතපුම් 14 ක් දුරින් ගුජාර් කාන් ප‍්‍රදේශයේය. අගමැති ධුරයට පත්වීමෙන් පසු ඔහු ඉස්ලාමාබාද් නුවර අගමැති නිල නිවසට ගියත් හැකි සෑම අවස්ථාවකම ගුජාර් කාන් ප‍්‍රදේශයේ නිවසට ද යෑමට සූදානමින් සිටී. ගුජාර් කාන් නිවසේ සිට අගමැතිවරයා අගනුවරට යාමට සහ ඒමට මාර්ග භාවිත කළොත් ආරක්ෂාවට පොලිස් නිලධාරීන් රැුසක් යෙදවීමට සිදුවන අතර ඒ සඳහා ලොකු වියදමක් දැරීමට ද සිදුවෙන බව පාකිස්තාන රජය පවසයි. පාකිස්තාන පාලක පක්ෂය විසින් තොරතුරු තාක්ෂණ ඇමැති ධුරය හොබවමින් සිටි අෂ්රාෆ් අගමැති ධුරයට පත් කර ගත්තේ පසුගිය සතියේය. ඔහු ඉකුත් 23 වැනිදා නව අගමැති ලෙස රාජකාරි ආරම්භ කළේය. නිරන්තරයෙන් ඉස්ලාමීය සටන්කාමීන්ගෙන් ද තර්ජන එල්ල වන බැවින් අගමැතිවරයාට පහසුවෙන් ගමන් බිමන් යෑමට හැකියාව ලැබෙන්නේ හෙලිකොප්ටරයෙන් බවත් ඒ සඳහා ඔහුගේ නිල නිවසේ හෙලිකොප්ටර් අංගනයක් නිර්මාණය කළ යුතු බවත් පාකිස්තාන රජය වැඩි දුරටත් කියා සිටී.