නයිජීරියාවේ ඩුමාටුරූ නගරයට කඩා වැදුණු ඉස්ලාමීය සටන්කාමීහු පිරිසක් වෙඩි තබමින් සහ බෝම්බවලින් දමා ගසමින් මුස්ලිම් පල්ලි දෙකකට, කි‍්‍රස්තියානි දේවස්ථාන පහකට සහ නගරයේ පොලිස් මූලස්ථානයට ඊයේ (6) දරුණු ප‍්‍රහාරයක් එල්ල කළහ. එම ප‍්‍රහාරයෙන් 65 දෙනෙකු ජීවිතක්ෂයට පත්වූ අතර තුවාල ලැබූවන්ගේ ගණන දෙසීයකට වැඩිය. ප‍්‍රහාරය එල්ල කළේ නයිජීරියාවේ කි‍්‍රයාත්මක ‘බොකෝ හරාම්’ ඉස්ලාමීය සටන්කාමී සංවිධානයයි. සටන්කාමීන් නගරයට පහර දීමට පැමිණි අවස්ථාවේ පොලිසිය වහා කි‍්‍රයාත්මක වූ අතර දෙපිරිස අතර පැය ගණනක් තිස්සේ වෙඩි හුවමාරු පැවැතිණි. එම වෙඩි හුවමාරුවේදී පොලිස් නිලධාරීන් සිවු දෙනෙක් ද මියගියහ. පොලිසිය පවසන්නේ මරාගෙන මැරෙන බෝම්බකරුවන් කිහිප දෙනකු ඇතුළු සටන්කාමීන් විසි දෙනකුගෙන් පමණ යුත් කණ්ඩායමක් ප‍්‍රහාරය සඳහා පැමිණි බවය. පොලිසියේ වෙඩි ප‍්‍රහාර හමුවේ සටන්කාමීන් කිහිප දෙනෙකු පලා ගිය බවත් ඔවුන් සෙවීමට හමුදාවේ සහාය පැතීමට සිදුවූ බවත් පොලිසිය පවසයි. තුවාල ලබා රෝහල් ගත කළ දෙසීය දෙනාගෙන් දහසයදෙනකුගේ තත්ත්වය බරපතළ අතර මියගිය ගණන තවත් ඉහළ යා හැකි යැයි ඩුමාටුරූ නගරයේ රෝහල් ආරංචි මාර්ග හෙළි කරයි. ‘බොකෝ හරාම්’ සටන්කාමී සංවිධානයේ මාධ්‍ය ප‍්‍රකාශක අබු කකා ප‍්‍රහාරයේ වගකීම බාර ගනිමින් කියා සිටියේ මෙවැනි ප‍්‍රහාර ඉදිරියටත් සිදු කරන බවය. වසර ගණනාවක් තිස්සේ නයිජීරියාවේ භීතිය පතුරුවන බොකෝ හරාම් සටන්කාමීන්, අපි‍්‍රකා අර්ධද්වීපයේ කි‍්‍රයාත්මක අල් කයිඩා සටන්කාමීන් සමඟ ද සම්බන්ධකම් පවත්වන බව බව ඇමෙරිකාව පවසයි.